مفيش حاجة اسمها زمن الفن الجميل... دى جمله اخترعها التليفزيون المصرى عشان يفضل يعرض الحاجات اللى عنده فى الارشيف و يدارى كسله انه يدور على الفن الموجود دلوقتى

ولو حضرتك مقتنع ان كان فى فن جميل و مش موجود دلوقتى يبقى انت محتاج تبطل تتفرج على التليفزيون و تدور على الناس اللى بنتحاول تعمل حاجات كويسة فى حتت تانية

جربت تتفرج على فيلم وحش جدا لدرجة انه حلو ؟! :)

كام مرة قعدت قدام فيلم سئ تتابع بمنتهى السعادة ؟!... للافلام السيئة سحر ما , يمكن لانك بتستغرب ازاى فى ناس ممكن تعمل كوارث و اخطاء مضحكة كدة و ضميرها مرتاح جدا لان ده فيلم سينما يا جماعة... و يالا يا ناس تعالوا اتفرجوا

ايد وود Ed Wood مثلا هو واحد من اهم الاسماء فى عالم السينما على مر التاريخ , لن تجد اجماع عالمى من النقاد و الجمهور على مركز هذا المخرج فى قوائم ترتيب المخرجين فى العالم ابدا , فهو و بجدارة يحتل المركز الاخير و يلقب بأسواء مخرج فى العالم , حتى ان ثلاثة من افلامة حصدت مراكز مرموقة فى قائمة اسواء 50 فيلم فى التاريخ ... شخصية مثيرة للاهتمام فعلا (ازاى الراجل ده قدر يعمل كم السفه ده !!!) ...
حتى ان هوليوود ذاتها اهتمت بصنع يديها و انتجت فيلم ED WOOD بطولة Johnny Depp

جرب تتفرج على جزء من رائعتة السينمائية Plan 9 from Outer Space ... الفيلم حلو فعلا :) التمثيل مسخرة و غطيان حلل على انها اطباق طائرة و اخطبوط كهربائى بايظ و حاجة فل على الاخر

أما troll ذلك الكائن المزعج كريه الشكل يحتل المركز ال 48 فى نفس القائمة بفيلمة الذى يحمل نفس الاسم ... و الكوميدى فعلا فى الفيلم ده ان صناع الفيلم متعلموش من الغلطة او المصيبة اللى عملوها ...بل و عملوا جزئين كمان من الفيلم ليتحفوا العالم بكم اكبر من العبط فى ثلاثية يخلدها التاريخ troll , troll2 , troll3
شاهد هذة الاجزاء من التحفة الفنية troll2 , لاحظ مستوى التمثيل ... لتكتمل لديك الصورة

هذا الجزء(troll 2) بالذات يعتبره البعض (احسن اسواء فيلم) فى العالم ...حتى انهم قرروا اعادة عرضة فى السينمات و عمل فيلم تسجيلى عن الفيلم و ابطالة و صناعة و اعادة لم شمل فريق العمل مرة اخرى ليحكوا عن الفيلم و ذكرياتهم عنه
شئ مثير فعلا .. أحسن اسواء فيلم !! ... و بالفعل ... اقبال جماهيرى عظيم .. ناس منبهرين بالفيلم لدرجة انهم يصرخون امام دور العرض (ده اعظم فيلم فى العالم ) :)
هنــــا موقع معجبين الفيلم ( الكلام بجد يا جماعة .. اعجاب فعلا ) .... و شاهد هنا جزء من الفيلم التسجيلى عن الفيلم

شكرا لجار القمر على نسخة فيلم ed wood و معلوماتة عن المخرج ed wood ذاتة

سكتنالو دخل بحصانة ... الاغنية لفريق كور ... انا معجب بيها جدا ... شاهد

الاغنية هى Sleep Now In The Fire لفريق Rage Against the Machine ...
1999

أقف على الكورنيش و لا يشغلنى الا الهروب من تيارات الهواء البارد مع المحافظة على رؤية واضحة للسيارات القادمة على طريق الكورنيش ...لم تكن فكرة التى شيرت (النصف مكممة) جيدة على الاطلاق , فالاسكندرية مولعة بالتمرد على ما كل ما يقال فى النشرة الجوية ... يتأخر صديقى ... و تزداد حالة التجمد
لسبب ما تقف بجوارى امرأة و طفل يمسك ببندقية لعبة يصوبها للمارة , بنظرة واحد أخمن ان الطفل لايحتاج ان يستخدم اكثر من يدة اليمنى عندما يسأله احدهم عن سنة , و انا لن أفعل فبالتأكيد لن يأخر صديقى الى هذا الحد
يفرغ الطفل من الطلاق النار على المارة و يقرر فجأة ان يصوب بندقيتة الي !! ... يصوبها بتحد ثم يضغط زنادها البلاستيكى فتخرج اصوات مسجلة لمعركة سينمائية كاملة (مدافع , مسدسات , قنابل... و اشياء اخرى ) ... يستمر فى الضغط بنظرة باردة خالية من اى متعة توفرها له اللعبة كما لو انه يقصد فعلا ان يقتلنى ... و يستمر الصوت ... اتمنى ان تفرغ البطاريات , لكنها لم تفعل ... او ان هذة اللعبة اكثر تطورا من العابنا القديمة و تعمل بتكنولوجيا ال RTYH 4152 مثلا او شئ من هذا الهراء
ارمقة بنظرة حادة لكنه لا يكل و لا يحول نظرتة المستفزة عنى ... حاولت ان اتجاهل الموقف لكنه صعب ... فانا تحت امطار من الرصاص و القنابل و المدافع الرشاشة ...و .... انتظر !!! ... ماذا تفعل اصوات السيوف داخل هذة المعمعة النارية !!! ... اين المنطقية يا صناع الالعاب ؟! .. الولد يحمل بندقية !!! ....
بدأت اعصابى تجهد من هذه الحرب التى تشن ضدى على قارعة الطريق ... و بدأت احرج من المارة فى الشارع و هم يشاهدوننى اقف مكتوف الايدى امام هذا الظلم الواقع على
قررت ان ارد الهجوم و صنعت من يدى شكل المسدس الطفولى الشهير و صوبتة للولد ...و اطلقت صوت مبحوح منخفض حتى يصل للطفل فقط و ليس لامة .... طاااخ
لا يتأثر الطفل و يستمر فى اطلاق لعبتة السخيفة
اكرر المحاولة ... طاااخ .... لا يهتم ...
لا يحرك يدة بعيدا عن زر اطلاق الاصوات المزعج
اطلق ثانيا ... طاخ ...
ثم اقول : قتلتك ... (ثم ضحكة سمجة : هيهيهيي)
- لا
- ايوة قتلتك ... طاخ
- لا
- طاخ ... طاخ ... طاخ ... قتلتاااااااااااااااك ( على وزن لا لا لاااالاااا... الشهيرة)
- لاء ... لاء ... لاء (ينفعل الطفل)

يترك الزناد لاول مرة و يمسك البندقية بما يشبة الشومة ... لم اكن متأكد من نواياه حتى هذة اللحظة ... يرفعها فى الهواء ... و ينزل بها تماما على النظارة ... يجيد هذا الطفل اختيار نقط الضعف ...
اتجنب الضربة ...
هو لازال يطلق صيحات الحرب : لاء ... لاء ....
و يستعد لتسديد الضربة الثانية ... يرفع البندقية فى الهواء ...اتلقفها انا ... تقبع الان ترسانتة الحربية كلها بكفى ... فيبدأ باصدار ذلك الصوت الشبية بصافرة الانذار ... تلتقت امة ... نعم !!! .. اين كانت طوال المعركة؟!!! ...
ترمقة الام بنظرة و تصرخ : ولد !!!
و لاننى لم اكن واثقا تماما من منا كانت تقصدة بالكلمة فقد تركت طرف البندقية من يدى فى الحال
جذب الطفل بندقيتة ثم جذبتة امة من يدة و ابتعدوا

رجعت انا لوقفتى الوقورة دون ان اعير ادنى اهتمام لذلك الشخص الجالس على المقهى يبتسم و يحكى لاصدقائة عن موقف طريف شاهدة للتو فى الشارع ...
ثم سرحت كعادتى فى بعض الافكار المتعلقة بسياسة الشرق الاوسط و موازين القوة فى المنطقة

اكتب اليكم الان و لذة الانتصار تملؤني ... قد (تتنيل ) العيشة لفترات طويلة لتأتيك لحظات النصر بشكل درامى يشبة دخله البطلة الشقراء ذات القوام الممشوق فى افلام المراهقين الامريكية (حركة بطيئة و شعر بيطير ... هارش الحركات دى ؟! .) ....
المهم ...
ركبت تاكسى من شوية بعد سهرة لطيفة و مروح البيت , و كان سواق التاكسى راجل كبير فى السن يلبس (ايس كاب ) حدسى يخبرنى انه (والله اعلم ) يلبسها كنوع من التدفئة فهى لا تبدو ( روشة ) علية تماما .. . يتحرك التاكسى (المهكع ) ببطء مزعج بينما يشغل تفكيرى موضع العداد السخيف الذى يأخذ المكان المتوقع لركبة اى راكب مهما كان طوله , و فكرت انه لولا ان السكه قصيرة لنزلت من التاكسى فى الحال , فانا قد نفذ صبرى من هذة العدادت عديمة القيمة ...اه و الله عديمة القيمة !!.. الا اذا كان هذا السواق التعس الذى يرتعش من البرد بجوارى يضع هذا العداد فى هذا المكان بالذات ليعكر صفو الركاب ... مش بعيد .. (نظرة بارتياب للعجوز .. يسعل السائق ) ... اه !!! .. يعملها الوغد !!
يصل التاكسى امام بيتى .. لم ياخذ الطريق سوى 4 دقائق خصوصا مع الشوارع الخالية ليلا ..
بس ياريس .. على جنب هنا
اخرج النقود .... 2.5 .. فل اوى
السائق : ناقص نص جنية كدة يا بيه
احرك راسى بهدوء فى اتجاهه رافعا الحاجب الشمال بتعبير يجمع ما بين التعجب و الاحتقار و الاستعداد لدفاع المستميت عن كل نصف جنية امتلكته يوما ... التعبير ده كنت اتمرنت علية لفترات طويله من قبل .. و الظاهر ان انهاردة يوم من الايام اللى يصعب ان يخونك ادائك فيها ..
ثم قلت : ليه ؟
فقال عم حسن ( لم اتعرف على اسم السائق لكن عارف لما تبص لواحد و تحس ان اسمه حسن ؟! .. عارف الشعور ده؟؟ ... اهو هو ده بالظبط )
المهم ...
قال سى حسن : احنا بلليل !!
و هنا تحديدا انطلقت الجملة العبقرية ... خليط مابين السخرية و الغضب و الاستعداد لدفاع المستميت عن كل نصف جنية امتلكته يوما ... يحضرنى هنا جملة على لسان توم هانكس فى فيلم (وصلتك رسالة بريدية الكترونية على بريدك الالكترونى ... ) حين قال موجها كلامة الى ميج رايان : (من الممكن ان امرر لك كل عباراتى الجارحة لتستخدميها و تصبحين وقحه و اتصرف انا بادب ... لكن احذرك من انك سوف تشعرين بالندم بعد ان تستخدمينها ) ... لكن الفارق هنا اننى لن اشعر بالندم ... ابدا ... الى الابد ... ماحييت ...........
المهم ...
قلت : ايوة .. ماهو عشان كدة اتنين جنية و نص .. مش اتنين جنيه !!! .. مش جنية و نص !!!
يسكت السائق.. ملقاش حاجة يقولها طبعا !!!
......
انزل من التاكسى ..
......
و ينطلق بالسائق
.....
.....

سيداتى انساتى سادتى ... و لدينا هنا فائز
نياهاهاهاهاهاهااااااااااااااااااا