مش ضرورى ترد على التلفون فى كل مرة يرن فيها !! دى كانت احد النصايح من عينة كيف تعيش سعيدا فى حاجة قرتها زمان كدة مش فاكر فين... هو كلام مقنع فعلا ...انت مش مضطر تكون موجود كل لما (اى حد) يعوزك بعد سنين من المحاولة اعتقد انى بقيت بعمل كدة فعلا ... بحلقلة تماما ... بس السبب مش الجملة دى اصلا السبب هو ان اللى بيعوزنى فى اى وقت من النهار او الليل بقى بيكلمنى على الموبايل اللى بالمناسبة يحمل خاصية الwaiting عشان يعنى حتى لو مثلا صادف ان معايا مكالمة ميفوتنيش مكالمة تانية !!!!
بالمناسبة ..
اعادة انغام لاغنية أشكى لمين بتاعت منير اصابتنى بالغثيان .. مش عارف اية اللى هيحصلى لما اسمع اغنية ولعت كتير بتاعت زياد و سلمى بصوت الاربع قطط ...اعتقد ده هيتعدى الغثيان بمراحل قد تؤثر على صحتى الانجابية
واحدة من اجمل الحفلات الايف اللى حضرتها فى حياتى ... سعاد ماسى كانت مبدعة (و زى القمر بقى الصراحة) و الباند اللى معاها كله جامد جدا (لو هتحضر حفلة القاهرة ركز مع لاعب البيز الاسمر... مسخرة) ..و اعتقد انها كانت سعيدة جدا بكم الناس اللى حضروا و الناس اللى كانوا حافظين اغانيها ... انا اقدر اقولكم كدة عشان انا كنت تحت الستيج بالظبط :)
ياجماعة اللى بيفكر يطنش او يقاطع حفلة القاهرة يفكر تانى عشان الحفلة متتفوتش ... ولو حد قالكم انه حضر و منبسطش يبقى مش بنى ادم .... و افتكروا يا جمهور القاهرة ان الاسكندرانية خلوها ترجع تغنى اغنيتين تانى بعد ما مشيت :)
و اخيرا رجاء من كل اللى صوروا الحفلة فيديو بكواليتى كويسة يقبوا بالفيديوهات ... الله يكرمكم