فى فيلمة التسجيلى الاول Super Size Me يقرر Morgan Spurlock انه هياكل لمدة شهر كامل الثلاث وجبات كاملة من ماكدونالدز ... فى البداية انا شخصيا كمشاهد اعتبرت ده نوع محاولة استفزاز مشاعر شخص أكيل مثلى و ان انا ممكن بمنتهى البساطة اعمل فيلم شبهه لو اتوفرتلى وجبات ماكدونلدز زى اخينا ده ... فين الفيلم فى الموضوع اصلا!! ... لكن الفيلم فعلا يشد ... لان الاخ ده بيحكى ايه اللى بيحصله صحيا طوال الشهر ده و الاضرار اللى تعرضلها قرب نهاية المدة و ده بشكل تسجيلى ... بيروح لدكاترة فعلا بيقيسوا حالته الصحية قبل و اثناء و بعد الشهر ده ... العجيب ان شخص ممتاز صحيا يتحول بعد شهر واحد ماكدونالدز لشخص يقرب على الموت تقريبا ... الفيلم ده اخد جوايز كتيرة ابرزها جائزه احسن مخرج فيلم وثائقى عام 2004 من مهرجان ساندانس

أما فى فيلمة الجديد ?Where in the World Is Osama Bin Laden قرر استاذ مورجان انه مش واثق فى المارينز الامريكانى و اقمار التجسس و كل الكلام الفاضى ده و انه هيروح بنفسة يلف الشرق الاوسط يدور على اسامه بن لادن ... على اساس ان اللى يسأل ميتهش و دى طبعا طريقة بوش معملهاش عشان هو بيتكسف يسال و كدة ...المهم انه فى بداية الفيلم بيقولك ان مراتة حامل و هيكون اب قريب (عقبال عندكم) و ده مخليه يفكر فى توفير السلام و الامان على الكوكب اللى هيستقبل المحروس و بالتالى البحث عن اكتر شخص مطلوب بتهمة الارهاب فى التاريخ ... طبعا البقين دول كلام فاضى ...

الفيلم عرض ايضا فى نفس المهرجان السنة دى ... و بيقول بعض النقاد عنة ان فيلم دمه خفيف بالرغم من انه مجاوبش على السؤ ال اللى بيطرحة ... بينما نقاد تانين شايفين ان الفيلم عبارة عن كوميديا بهتانة و تكلفة مبالغ فيه و لعب على تيمة شغالة كويس اليومين دول و هى الشرق الاوسط

أنا عن نفسى مستنى اشوفة على سبيل الفضول و معجب بالبوستر اللى بيقلد Indiana Jones اللى بالمناسبة هينزل منه جزء جديد السنه دى ... العب يا هاريسون و وريهم :)

جربت تتفرج على فيلم وحش جدا لدرجة انه حلو ؟! :)

كام مرة قعدت قدام فيلم سئ تتابع بمنتهى السعادة ؟!... للافلام السيئة سحر ما , يمكن لانك بتستغرب ازاى فى ناس ممكن تعمل كوارث و اخطاء مضحكة كدة و ضميرها مرتاح جدا لان ده فيلم سينما يا جماعة... و يالا يا ناس تعالوا اتفرجوا

ايد وود Ed Wood مثلا هو واحد من اهم الاسماء فى عالم السينما على مر التاريخ , لن تجد اجماع عالمى من النقاد و الجمهور على مركز هذا المخرج فى قوائم ترتيب المخرجين فى العالم ابدا , فهو و بجدارة يحتل المركز الاخير و يلقب بأسواء مخرج فى العالم , حتى ان ثلاثة من افلامة حصدت مراكز مرموقة فى قائمة اسواء 50 فيلم فى التاريخ ... شخصية مثيرة للاهتمام فعلا (ازاى الراجل ده قدر يعمل كم السفه ده !!!) ...
حتى ان هوليوود ذاتها اهتمت بصنع يديها و انتجت فيلم ED WOOD بطولة Johnny Depp

جرب تتفرج على جزء من رائعتة السينمائية Plan 9 from Outer Space ... الفيلم حلو فعلا :) التمثيل مسخرة و غطيان حلل على انها اطباق طائرة و اخطبوط كهربائى بايظ و حاجة فل على الاخر

أما troll ذلك الكائن المزعج كريه الشكل يحتل المركز ال 48 فى نفس القائمة بفيلمة الذى يحمل نفس الاسم ... و الكوميدى فعلا فى الفيلم ده ان صناع الفيلم متعلموش من الغلطة او المصيبة اللى عملوها ...بل و عملوا جزئين كمان من الفيلم ليتحفوا العالم بكم اكبر من العبط فى ثلاثية يخلدها التاريخ troll , troll2 , troll3
شاهد هذة الاجزاء من التحفة الفنية troll2 , لاحظ مستوى التمثيل ... لتكتمل لديك الصورة

هذا الجزء(troll 2) بالذات يعتبره البعض (احسن اسواء فيلم) فى العالم ...حتى انهم قرروا اعادة عرضة فى السينمات و عمل فيلم تسجيلى عن الفيلم و ابطالة و صناعة و اعادة لم شمل فريق العمل مرة اخرى ليحكوا عن الفيلم و ذكرياتهم عنه
شئ مثير فعلا .. أحسن اسواء فيلم !! ... و بالفعل ... اقبال جماهيرى عظيم .. ناس منبهرين بالفيلم لدرجة انهم يصرخون امام دور العرض (ده اعظم فيلم فى العالم ) :)
هنــــا موقع معجبين الفيلم ( الكلام بجد يا جماعة .. اعجاب فعلا ) .... و شاهد هنا جزء من الفيلم التسجيلى عن الفيلم

شكرا لجار القمر على نسخة فيلم ed wood و معلوماتة عن المخرج ed wood ذاتة

حيث ان معنديش حاجة اقولها و حيث انى مقضي المرحلة دى من حياتى فى الفرجة ... اسمحولى اشارككم حاجة تستاهل تتشاف
فيلم أسترالى قصير booth story إخراج : Kasimir Burgess و Edwin McGill

Radiohead فريق روك متطور جدا فى نوع المزيكا اللى بيقدمه, احيانا يصنف Alternative rock او Electronic music لكن فى الاخر هو فريق مختلف عن اى حاجة شبهه, انا من المعجبين بيه جدا من اول ما اتعرفت بيه من حوالى سنتين... لكن تصنيفى (الغير علمى بالطبع ) هو فريق ابن مجنونة سيكوباتى
الفريق مؤخرا اعلن عن صدور البومهم الجديد in rainbow لكن طبعا كعادتهم لازم تلاقى حاجة مش عادية فى الخبر ... الالبوم من انتاج الفريق نفسة بدون الاستعانة بشركة انتاج , و بالتالى فان مبيعات الالبوم رايحة بالكامل للفريق و لهذا قراروا ان :ياجدعان محدش ينزل الالبوم من الانترنت و الكلام الفاضى ده .. اتفضل نزلة من عندنا و ادفع الرقم اللى انت شايف انك عايز تدفعة كتمن للالبوم حتى لو عايز تدفع دولار واحد فقط ( بس هتروح من ربنا فين )
و الالبوم مش هينزل فى نسختة المادية (يعنى سى دى ) قبل شهر من دلوقتى
حاجة مثيرة للاهتمام جدا و انا اعتقد ان دى ممكن تبقى طعنة لشركات الانتاج لو كل الفرق الكبيرة قررت تعمل كدة
من الحاجات المميزة جدا للفريق الartwork بتاع أغلفة البوماتهم .. هما بيهتموا جدا بيها و
بتطلع شبهم جدا و شبه مزيكتهم غير المألوفة
ده كليب لاغنيةNo Surprises

بالمناسبة... فى هنا خبر بيقول ان Jonny Greenwood عازف الجيتار بالفريق (مش بس جيتار .. الكائن ده بيعزف على اعجب اشياء شفتها فى حياتى ) ... هو اللى هيعمل مزيكة فيلم there will be blood للمخرج بول توماس اندرسون ... انا كنت نزلت التريلر الاولانى للفيلم من فترة .. بس التريلر الجديد نزل و انا متحمس له اكتر الصراحة

وانا شامم ريحة ايقاعات جونى فى التريلر

Michel Gondry مخرج الفيلم المطرقع Eternal Sunshine of the Spotless Mind و الفيلم المهيس Massive Attack على حد تعبير ربيع .. هو واحد من المخرجين اللى بيستخدموا الجرافيكس و الخدع بشكل مبهر جدا
مؤخرا مايكل جوندرى عمل اعلان لاحد موديلات موبايل موتورولا (اه و الله .. مش عيب يعنى )
بس بص بقى الاعلان عامل ازاى ...

موتورولا عملت موقع مخصوص للاعلان و فية الاعلان كامل و ميكينج و سكيتشات لجوندرى بنفسة
لكن أظرف حاجة فى الموضوع بقى ان موتورولا عملت كمان موقع تانى فيه مجموعة من الاعلانات بتاعتها لكذا مخرج و فرصة لسيادتك انك توريهم شطارتك لو عايز و تعمل انت اعلان ليهم ...

تنزل السكريبت و صور الموبايل ... و اتفضل ورينا نفسك !!

فيلم انجليزى قصير شاهدتة من حوالى سنة مثلا لكنة لازال مضحك بالنسبة لى جدا :)
الفيلم تم تصويرة فى مطبخ المخرج .. الكاميرا ثابتة ... تكلفة الفيلم بالكامل 15 جنية استرلينى (يعنى استرلينى بعطفك و اغمرينى بحنانك...اذا بدك *)
الفيلم حاصل على جائزة فى مهرجان افلام قصيرة , اسم المهرجان هو اللى طريف بقى ... اسمة Eat My Shorts!

_________________________________

* الملحوظة المقوسة (يعنى اللى فى الاقواس) من جمل العظيم زياد رحبانى .. فى برنامج العقل زينة

يمكن لان فكرة السفر مسيطرة على اليومين دول ... عشان كدة الفيلم ده كان مضحك بالنسبالى جدا
Goodbye to the Normals
هو فيلم قصير من انتاج 2006 اترشح و حصل على مجموعة جوايز ... استخدمة روبي وليامز للدعاية لالبومة Rudebox فى مقابل استخدام المخرج لاغنية Burslem Normals
مدة الفيلم 3 دقائق وهو متاح للمشاهدة على الانترنت ... شاهد نسخة الفيلم كاملة

المخرج المعجزة Paul Thomas Anderson مخرج المصيبة magnolia و الكارثة punch drunk love
يضع الان لمساتة الاخيرة على فيلمة الجديد There Will Be Blood الذى استغرق حوالى اربع سنوات فى صنعة و المأخوذ عن كتاب Oil للكاتب Upton Sinclair , و الفيلم من بطولة Daniel Day-Lewis

و ده اول جزء من الفيلم يظهر للجمهور على سبيل الدعاية

- كل معلوماتى عن Phil Collins انة مغنى ليه شوية اغانى ظريفة و كان درامر فريق Genesis .. لكن كان ديما معلقة معايا اغنية سمعتهاله فى الام تى فى الهندى الله يمسيها بالخير بقى كانت اول مصدر مزيكا الواحد عرفة فى حياتة ... و فضلت فاكر الكلمات لكن مش لاقى الاغنية دى فى اى حتة .. لحد ما وقعت فى ايدى بالصدفة ... شاهد الاغنية المرحة و هتعرف انها تستاهل تعلق فى دماغى كل الوقت ده .. كفاية ان Danny DeVito بيظهر فى الفيديو

- شاهد هنا اسخف مشاهد السينما ... اكيد دول مش بنى ادمين :)

- و دى اغنية بانتومايم بس مسخرة

- ده بقى يا سيدى فيلم شكلة كدة هيطلع جامد ...شاهد التريلر ...عذرا طبعا على الاباحة

- و هنـــا خبر ان Steven Spielberg و Peter Jackson هيعملوا ثلاثية افلام تان تان ... اخيرا حد فكر فى كدة يا جماعة .. انا من اشد المتحمسين للموضوع ده

- و اخيرا احد الحواديت اللطيفة على الشبكة ان عم احمد فؤاد نجم شخصيا عندة بلوج

نجوان درويش من جريدة الاخبار اللبنانية تقول رأيها فى الفكرة و تتكلم عن فيلم جزر

الصديق النشيط بهظ بيه يقترح فكرة سينمائية سكندرية بلجاوية تحترم الصراحة
بيقول ان مدام فى حركة سينما مستقلة فى اسكندرية محدش دريان بيها فـ ليه متتحركش الصحافة المستقلة متمثلة فى البلوجات انها تكتب عن السينما دى و تنقدها و تعملها دعاية ...

الكلام جميل جدا و عاجبنى ولو انى شايف ان العروض تبقى مفتوحة لكل الناس ...مع التركيز على الناس اللى عندها مساحة تكتب فيها رأيها (البلوجرز او غيرهم)

و البداية هى فيلم جــــزر لمحمد صلاح ... انا لسة مشفتوش و سعيد بالعرض جدا

واضح كمان ان الموضوع بدأ يلاقى صدى هنا و هنا ... و طبعا مدونة كيس فشار مسكتتش

كل اللى يقدر يحضر يا جماعة ... عرض الفيلم هيكون انهاردة الاربعاء 2 مايو
الساعة 8 فى المركز الثقافى الالمانى

film racing
هى مسابقة تجوب مدن الولايات المتحدة الامريكية للبحث ان صناع السينما الهواة ليصنعوا افلامهم المستقلة بشرط ان تتم كل مراحل الصناعة من كتابة و تصوير حتى المونتاج فى خلال 12 ساعة فقط
بدأت الفكرة فى 2006 بمدينة نيويورك بصناعة 5 افلام قصيرة و تم التحكيم بينهم و اختيار افضلهم ... و تنتقل المسابقة بعد ذلك و فقا للجدول لبوسطن و منها الى مدن اخرى
الحقيقة الخمس افلام رغم تواضعهم الا انهم (لازم يتشافوا) ...

pills هو اكثرهم نضوجا و هو الحائز على جائزة الفيلم الاول و احسن ممثل و احسن ممثلة و احسن مخرج بالرغم من ان الموقع يكتب عنه انه صنع فى اسبوعين الا ان التترات تقول انه صنع فى 12 ساعة (حسب شروط المسابقة) !!!

Searching for Terry هو الفيلم الحاصل على المركز الرابع و جائزة الجمهور ... و هو احسن فيلم فى الخمسة افلام من وجهه نظرى .. فيه لغة صورة ظريفة

انا معجب بالفكرة جدا ... بالرغم من انها كمسابقة امريكية فهى تعتبر (لعب عيال) من حيث جوائزها الرمزية و نوعية الافلام البسيطة بها ...
لكن انا شايف اننا احنا هنا فى مصر : ليه منعملش كدة ؟
ليه منعملش يوم (بلاش 12 ساعة خليها 24 )و يتجمع 2 او 3 مجموعات يطلعوا افلام قصيرة ؟
مجرد فكرة ...

جربت (تسمع) فيلم بدون ان تشاهد الصورة؟ ... تجربة مثيرة على فكرة .. فى البداية حسيت انها هتكون مملة و مش كفاية السمع عشان تفهم كل تفاصيل الفيلم خصوصا انى من المهتمين بالصورة اكتر
بس جربت اعمل كدة مع فيلم احفظه عن ظهر قلب ... الموضوع مسلى جدا ... و أكتشفت حاجات جديدة خصوصا فى المزيكا اللى ساعات بتوه منى و انا بتفرج على الصورة ...
و فى ميزة تانية بالنسبة لموظفين المكاتب اللى زى حلاتى انك ممكن تعمل كدة و انت فى الشغل (و بتشتغل) و قاعد ضارب السماعات و عامل عم المنهمك
جرب تعمل الحكاية دى هنـــــا ...هتلاقى تقريبا اى فيلم تتخيلة