Monday, March 19, 2007

عن السيميائى ...و الرزق على الله


ملحوظه مهمة : مجانين باولو كويلو يمتنعون ... و اللى عايز يشتم يشتم بأدب ... التدوينة دى مجرد رأى شخص بسيط فى اكثر روايات العالم مبيعا

اكتر من شخص نصحونى بقراءة كتاب ساحر الصحراء لباولو كويلو فى كتير منهم مجانين بيه جدا , لكن انا كالعادة عندى ديما فوبيا من الاعمال التى تشتهر بشكل مبالغ فية ... لكن بعد فترة قلت اخلى عندى دم و اجرب اقراها بقى و ابقى مثقف كدة و بفهم ... خصوصا اننى اصبحت احمل شنطة المثقفين الشهيرة بشكل دائم تقريبا
المهم ... جبت الكتاب ... و بدأت اول 50 صفحة و حسيت انى امام عمل لطيف ... حاجة كدة تدعو للتفاؤل و تشبة الى حد كبير حواديت الاطفال
شخص يترك حياتة كلها و يذهب للبحث عن اسطورتة الذاتية .. جميل !!
و فى طريقة يقابل علامات تدلة على كنزة ... بديع !!

لكن بعد شوية ....
نسى الكاتب تماما هذة العلامات (او ركنها على جنب شوية ) و ظهر شئ مبهم تماما يسمية روح العالم ... بس بقى ... خد عندك فى روح العالم دى للصبح ...بقت كل صفحة من الكتاب تحتوى على اتنين روح العالم على تلاتة اسطورة ذاتية ... على جملة فلسفية كدة افتكسها (عندما ترغب فى شئ يتأمر الكون كله ليسمح بتحقيق رغبتك ) ... مين قال كدة؟ !!! ... ايه الجملة دى ... حاجة تدعو للتفائل ... بس ساذجة جدا
الشاب راح اشتغل فى محل كريستال ليقرب من روح العالم و كان الكريستال يساعدة لتحقيق رغبتة ... بدأ يفهم اللغة العربية لانة يعرف روح العالم ... و سافر فى الصحراء و اخذ ينصت لصوت الصحراء ليتعرف على روح العالم ... قابل سيميائى اللى عندة برضة اسطورة ذاتية و عندة زمردة مكتوب عليها روح العالم و يبحث عن سر تحويل النحاس اللى ذهب ... و ناسى (بسلامته ) ان النحاس ليه اسطورة ذاتية برضة !!!

كم سخافة بقى و تكرار و حكم معلبة بشكل سمج ...

المهم جيت على نفسى و قلت لازم اكمل يمكن لما عم الشاب ده يوصل لاسطورتة هنكتشف حاجة تستدعى كل الحكمة التى حصل عليها طول الطريق ..و المرأه اللى تركها عشان يروح يجيب كنزة و يحقق اسطورتة ... ها ؟! ... ايه بقى ؟ ... بعد ما وصل ... و خلاص فاضل خمس صفحات كدة ... طلع الكنز كان فى بلده .. ماشى و ماله ... بس .. رجع ..و جاب الكنز !!! ... كنز فعلا !! ... دهب و كدة !!! ... نعم ؟!!! ... هو ده !!!! ... الفلوس ... الاخ ده كنزة فلوس ؟ ... هى دى الاسطورة ؟؟
جالى حالة من الشلل الرعاش و انا بقرا اخر سطور فى الكتاب .. البية بقى غنى ... طب ماهو كان غنى فى مرحلة ما فى نص الكتاب !!! ... بعد كل الحكمة دى و روح العالم و الاسطورة و البت اللى سابها عشان الاسطورة يطلع فلوس !!! ...

صحيح .. الفلوس هى كل حاجة

فكرة الرواية كويسة و الله ... و تلفت نظرك للقوة الكامنة داخلك ... و تدعوك للاندماج مع الطبيعة و محاولة فهمها ... بس للاسف بسذاجة ... الكاتب محاولش يقربنى من الاسرار اللى اكتشفها الشاب فى الصحراء او الكريستال ... الخ , هو فقط جعلنى اتعاطف مع محاولاتة و تضحياتة للوصول لأسطورته ... ليفاجئنى فى النهاية انها كنز مادى تمام ...لو كان وقف فى اى مرحلة من رحلتة و اعتبر ده كنزة يمكن كنت هقتنع اكتر ... و قال ايه فى اخر سطر بقى : جايلك يا فاطمة !!!!!!!!

معقول ده الكتاب اللى قلب الدنيا ووزع كام مليون نسخة و ترجم لكل لغات العالم !!!!!!!!!!
اعذروا جهلى الشديد ... يمكن انا مش قارئ جيد ...و لا ينفع انقد عمل ادبى ... بس ده رأيي ... اعتبرة رأى شخص تافه مالوش فيها :

بغض النظر عن ترجمة بهاء الطاهر ...الكتاب سخيف فعلا


Labels: ,

Posted by S H E B A K at 2:28 AM



29 Comments

  1. Blogger Solo posted at 12:14 PM  
    و الله انت فطرتك سليمة يا شباك يا بنى

    أحمد السقا بيه فى فيلم تيتو كان برضه ماشى بنصايح كويليو و بيدوّر على اسطورته الذاتية بشكل أدهش حنان ترك هانم , لكنه للأسف مات فى نهاية الفيلم ... أصل الاساطير الذاتية دى حظوظ :)
  2. Blogger مُزمُز posted at 12:26 PM  
    ههههههه

    مجانين باولو كويلهو فعلا ممكن يوقعوا عليك حد الردة

    أنا كمان عندي فوبيا شديدة من الأعمال التي تشتهر ومن الأدباء الذين يضربون فجأة

    وزي ما انت قلت هي آخرها عمل للأطفال

    أسطورة ذاتية إيه وأحة إيه

    وبعدين كان مستفزني الملك اللي نزل عليه ده

    اشتغالة تنفع مع العيال عشان يذاكروا بس زي اشتغالة اشرب اللبن تتطلعلك عضلات

    أنا رأيي إن باولو كوبلهو نفسه لي عملين أجمل من ده حتى لو قلنا إنه تفاؤله ده حقيقي وتمام بس صياغة السيميائي نفسها تافهة جدا مفيهاش أي تعب أو لعب يعني فيرونيكا أقوى من السيميائي كتيييير جدا برغم برضه كمية التفاؤل الغريبة اللي فيها إلا إنها رواية مش قصة بتتحكي تحت شجرة في الغيط
  3. Blogger wmn posted at 1:52 PM  
    هو راجل لطيف ، مقدرش انكر ، انما مشكلته انه تم تضخيمه زيادة عن اللزوم لحد ما بقى ماركة تشتريها لان الناس بتشتريها ، و الناس بتشتريها لمجرد انها ماركة !
    لو عاوز تتخنق اكتر اقراله مجموعة قصصية اسمها "مكتوب" من اصدارات ميريت .. مسخرة !
  4. Blogger ثلاثاء posted at 2:48 PM  
    انا شخصيا قرأت كفاية من الكتب لباولو اللي بتخليني اوصل لنتيجه انو بستحق لقب "ساحر الكلمه".
    طريقة كتابته بسيطه جدا, بس في بساطتها بتحمل كثير معاني, وتأثيرها قوي جدا, يعني جامد!الاشي بتعلق في كل واحد فينا وقدرته على قراءة ما وراء السطور, واللي من جهته بتكون موجوده داخل اطار تجاربه الذاتيه وصراعاته الداخليه في الاساس.
    احنا بشر وكلنا النا اسطوره بندوّر عليها ولو كانت في خيال احنا عملناه مثل "الخيميائي". وكل واحد مرّت عليه لحظات انه يفكّر في انهاء بقاءه متل "فيرونيكا تقرّر ان تموت".
    صحيح انه "الخيميائي" مش من افضل اعماله, بس لسا الامل موجود.
    اقرأ فيرونيكا.
  5. Blogger Rivendell** posted at 4:29 PM  
    احذر من حد الردة اللي اكيييييد هيتطبق عليك

    ههههههه

    وجهة نظر برضه , انا تهت في تفاصيلها الكتير يمكن لاني كنت بقراها على الكومبيوتر وعيني زغللت

    لكن متفقة معاك كويلهو كتب حاجات تانية كانت قمة في العبقرية
  6. Blogger Pianist posted at 6:24 PM  
    اسكت مش انا جبت شنطة من بتوع المثقفين دول انا راخر
    هاتبقي ظيطة
    :D
    انا ماحبتش الرواية اوي بصراحة ، انت معاك حق في ان كلها حكم معلبة فعلا وسطور كده من اللي يتاخدوا ويتعمل منهم كام شعار ظريف
    حاجة كده زي كتب ديل كارنجي بتاعة اطلق المارد اللي جواك ودع القلق وابدأ البتاع والكلام ده لكن ده مايمنعش ان الرواية مش بالسوء ده يعني
    برضه فيها شوية حاجات بصراحة الواحد ساعات بيحس انه عايز يقراها
    ده رأيي برضه انا الرواية بالنسبةلي ماكنتش بالبشاعة دي
  7. Blogger عباس العبد posted at 8:58 PM  
    يا شباك يا ابنى
    انت قريت رواية عباس العبد لأحمد العايدى
    اى حد طبيعى بيستعبط باولهو كويلهو
    و طبعا اى حد طبيعى بيحب باولو كويلهو
    لأن كل واحد بيبحث عن اسطورته الذاتية و ازمة الخيار و ارتفاع سعر الزيتون و روح العالم و الكنز و العلامات
    لازم يوصل لغاية هناك حيث يكمن الداخلى فى الخارجى و تخرج الذات من الانا
    فتلاقى نفسك بقيت بنت عمك
    يعنى زيتك يبقى فى دقيقك
    و ليعم السلام العالم
    peace be on earth
    و انطلق فانت فى المكان الذى كان فصار و اصبح فامسى
    امضاء
    باولو كويلهو
  8. Blogger السهروردى posted at 10:32 PM  
    gcgbنصحيه مهمه لو قريت كتاب أو شفت فيلم واتخنقت منه قوى لو تقوم وتسيبه وإلا حيتطاردك فى الأحلام يا معلم
    خصوصا لو كانت حاجه منصوح بيها من قبل
    باولو كويلو جابلى تضخم فى مناطق معينه فى جسمى لدرجه إنى رحت أستشير طبيب مسالك بوليه
    ساحر الصحراء زفت جدا
    وفيرونيكا برضه زفت المُلل (جمع مُله)
    القصيتين تيماتهم مسروقه من كذا حته
    سيب أساسا إن معلومات الراجل فى الجغرافيا زباله فى ساحر الصحراء أو الخيميائى
    ممكن يكون لباولو حاجات أحسن من اللى المنتشر ليه والله أعلم
  9. Blogger monBYH posted at 11:00 PM  
    يخرب عقلك ..
    بهدلت السيميائي
    وبهدلت باولو كويلهو

    انا ماليش دعوة ..انا حذرتك من حد الردة من مغرمين السيميائي ..

    مش وحشة اوي كده..
    انا عجبتني
    و العلامات دي جربتها شوية

    :)

    صحيح..
    مبروك الشنطة
    ;)
  10. Blogger Unknown posted at 1:11 AM  
    روح العالم مجرد رمز..الكريستال هو احدي التحديات..و الكنز ماجاش فلوس بالمعني ده..الكنز في الرحلة.. اللي هي الحياة..روح العالم هو التحدي اللي جوانا لنكون افضل تصالحا مع الذات و فهم الحياة ببساطة ليس اكتر و ان كان الكاتب شاعري في تعبيره الي حد ما ..لن تكون هناك علامات بدون عقل و روح تحمل العالم بداخلها ..تحويل النحاس الي ذهب رمز ايضا ..عن محاولات البشر لبلوغ الكمال..عموما مفيش عمل فني و ادبي خصوصا
    لا يحتمل اكتر من احتمال و تأويل وده اللي بيميز العمل الفني..
  11. Blogger Nour posted at 8:09 AM  
    دايما باحس إنه الحاجات المعمول عليها بروباجاندا جامده كده و تقلب بموضه بتبقى فاضية قوي من جوّة.. أنا قريتله فيرونيكا و 11 دقيقة و حاولت أقصى جهدي إني أكمل أكتر من 20 صفحة في "الظاهر" و فعلا مقدرتش.. كل ده على أمل إني ألاقي "الشىء الوهمي" اللي الناس بيتكلموا عنه ف كويلهو و فشلت فشل ذريع.. و رزقنا كلنا على الله :))))
  12. Blogger ola salem posted at 11:48 AM  
    بص بقى سيبك من السيميائى نهائيا دى مقبوله عن غيرها صدقنى
    مش هتحس بالكلام ده فعلا غير لو قريت
    على نهر بيدرو جلست وبكت
    هتقوم من الكرسى ولا الكنبة ولا الأرض حتى وترفع ايدك وتقول تحيا مصر
    وبالنسبا بقى لباولو كويلو ربنا يديله الصحة كمان وكمان ويرزقه كمان وكمان على حس القراء فانا بحس انه بقى اعلامى اكتر من انه اديب يعنى تلاقى الناس كلها عارفه باولو كويول وما حدش بيقرا حاجة
    انا عن نفسى اول مرة عرفته خالص لما طلبوا منا نترجم مقال من النيويورك تايمز طلعت بترجم مقال كويلو وكذلك صباح الخير يا مصر .. لانه فعلا أديب بلا ملامح بس زكى بردو حدش ينكر يعنى
    وانت خير انك قريت الرواية يا عمدة والله دى ظاهرة صحية هبقى ادى بولين خبر(:(:أصلها بتحب باولو كويلو(:(:
  13. Blogger d-vision posted at 1:10 PM  
    لحظة لحظة في خاطري ضحكة ههههههههههههههههههههههههههههههههههه خليني اقولك بالمصري (يخرب عقلك موتتني ضحك)!!
    من أجمل الأشياء اللي اشوفها في المدونات المصرية هو خفة الدم في الطرح وحتى لما يكون المطروح نقد قوي و في الصميم قادرين ماشاءالله أنهم يرسموا البسمة على وجه القاريء!

    الله يعافيك هذا أولاً...

    ثانياً....عارف؟ أنا جالسة اقرا الخيميائي الحين! لسه ماكملتها بس والله في الجزء الأول كذا حسيت فعلا زي ماقلت انها زي "حواديت الأطفال" لكني زيك استمريت في القراءة على أمل أن تطلع الفكرة أكبر من "حدوتة" ..

    أكثر شي شد انتباهي هو المعرفة و الاطلاع الواسع الذي يبدو عند كويلو عن المسلمين والعرب!

    على العموم ماكنت احب احرق على نفسي لكني ماقدرت أوقف قراءة تدوينتك!
    يمكن أكمل و يمكن لا! بشوف...لكن الأكيد اني على الأقل تأكدت أن جابرييل جارسيا ماركيز لايُعلى عليه! خصوصاً مع قول البعض ان كويلو تفوق عليه!

    إلى المُفضلة مدونة مميــزة تمنياتي لك بالتوفيق
  14. Blogger Lasto-adri *Blue* posted at 4:39 PM  
    كويلهو دا بروباجندا مظبوووط
    لما قرأت السيميائى دى شبه جاللى شلل رباعة.. فقالولى لاء.. ما انتى ما تقرأيش اللى فيرونكى.. مسكت البنية.. ومقدرتش اكمل الفصل التانى من كتر ما بتاوب كل ما امسك صفحة جديدة
    !!
  15. Blogger خوليو posted at 4:26 AM  
    من قرائتى لعموده فى اخبار الادب اتخنقت بما يكفينى عشان ماشتريش له كتاب
    لكن بغض النظر عن روايته موضوع البوست , يؤسفنى اقولك ان الحكاية فى النهاية برضو فلوس
  16. Blogger Sekhmet posted at 2:40 PM  
    انا قريت السيميائى من فترة طويلة و عجبتنى الى حد ما
    بس البوست ده فكرنى بحاله الشلل اللى جالى و انا بقراله "حاج كموبستيلا" بجد حسيت انى قاعده فى حلقة وعظ و مقدرش افهم هو عايز يقول ايه بالضبط و شكيت ان العيب فى
    سيبك
    انت رفعت من معنوياتى
  17. Blogger ألِف posted at 9:14 PM  
    أنا سمعت تمثيلية إذاعية مبنية على ترجمة بهاء طاهر للخيميائي في إذاعة البرنامج الثاني تقريبا كدا سنة 2000.

    ما عجبتنيش.

    و دي كانت علاقتي الوحيدة بقصص كويلو؛ لكن لما ضربت موجة كويلو و الجنون به حاصرني في كل دوائر معارفي؛ تصفحت الترجمات الإنجليزية لأعماله في المكتبات؛ يمكن يكون ظني في غير محله و أجد ما يجذبني، لكن ما حصلش.

    رأيي في كتبات كويلو أنه مثل كتب التنمية الذاتية: "كيف تكسب الأصدقاء و تكون واثقا في نفسك و ترى الدنيا بمبي". إلا أنها موجهة للمراهقات، و بالتحديد اللائي في الفئة العمرية ما بين ¼ 13 و ¾ 14

    بمناسبة التيمات المسروقة و بمناسبة "أن تكون عباس العبد"؛ هو ما حدش واخد باله أن "أن تكون عباس العبد" برضو تيمتها مسروقة من فيلم The Fight Club/القصة المبني عليها الفلم؟

    يعني هي مش سيئة..تمصير كويس..لكن الاحتفاء الذي قوبلت به لا يتناسب مع كونها مقتبسة من عمل آخر، و ليست غير مسبوقة!
  18. Anonymous Anonymous posted at 6:17 AM  
    و الله يابني أنا الهوجة إياها صرفتني عنه و جعلتني غير متحمس للقراءة له تماماً، مرّة قرأت له سلسلة من قصص الأطفال يحكيها جد إلى حفيده و زهقت منها جداً.

    ألِف: موضوع التنمية البشرية ده فاشخني في أفكاري، لعلك تذكر تدوينة قديمة لي بعنوان "نميلي مواردي و النبي يا أحمد" .

    بالنسبة لعباس العبد، من لم يلاحظ هذا بالطبع أحمق.. أحمد العايدي نفسه مهدي القصة في بدايتها لمن أثروا فيه و منهم مؤلف رواية "نادي القتال".
    و لكن الرواية كانت بها الكثير من التجديد و الأساليب الجديدة و الغريبة في الكتابة التي تحسب له.
  19. Blogger زمان الوصل posted at 1:49 AM  
    لم أقرأ لكويلهو سوى "ساحر الصحراء" و أعتقد أنّها كانت كافيه جدّا .. حسبما قرأت عن رواياته الأخرى الموضوع مثل قماشه أو تيمه واحده يعمل عليها فى كل رواياته .. لحن واحد يعاد توزيعه كل مره بصوره مختلفه .. فلم وجع الدماغ و تضييع الوقت !! كفايه من الحزمه فجله ..

    بمناسبة الحديث عن المثقفين و شنطهم .. فيه روشته أو وصفه جاهزه كى تتعامل مع نفسك و تطلب من الآخرين التعامل معك بصوفك مثقّف ..من ضمن بنودها إنّك تروح ساقية الصاوى و تقرا ساحر الصحراء
  20. Blogger عبسميع posted at 8:31 PM  
    حسنًا أنا أحد أولئك المجانين بهذا الجل
    أحب أعماله وأقرأها منذ فترة طويلة قبل أن تبدأ هوجة كويهلو تجتاح العالم
    لكني لا أحجر علي رأيك فهي حريتك الشخصية تمامًا يمكن أن نقول ما فهمته أنت من الخميائي ليس ما فهمته أنا منها
    فأنت أخذت القصه علي معناها الأولي كقصه أما الأخرون فتعمقوا بها ليأخذوا منها ما هو أعمق وهذه عبقرية الكاتب انك كلما تتعمق بداخل الرواية كلما أخذت منها أكثر
    كما أن الرواية بها جزء عبقري أخر أن كل فصل من فصولها يصلح قصة قصيرة مستقلة

    لا أدري ولكني أعتقد أنك قرأت الرواية وانت متحفز لتصيد لأخطأ ربما تراها
    في النهاية أنا لا أدافع عن العمل فهذا العمل يدافع عن نفسه أكثر من دفاع أي شخص
    كما أني لا أحجر علي رأيك الشخصي فأنت حر به تمامًا
    فقط أحببت توضيح وجهة نظر معينة
    شكرًا

    تحياتي
  21. Blogger SaSo posted at 1:07 AM  
    مالها موش فاهمه؟هيه كون انها بتدعو للتفاؤل دى جريمه وبعدين موضوع العلامات اشتغل معايا كويس
    عموما بيتهىءلى انها لو معجبتكش متحاولش تقرالو حاجه تانى لان تقريبا دى أعدل حاجه كتبها
    تحذير هام:تجنب فيرونيكا,بيض بيض بضي الصراحه
    هو ايه شنطه مثقفين دى,هل ليها صله بشنطه رمضان؟
  22. Blogger Unknown posted at 4:14 PM  
    انا اسف يس حضرتك بتبص نظرة سطحية للموضوع و مش هقدر أقول أكتر من كده .............. لأن أكيد برضه مش هتفهم ززز كل كلمة فلكتاب ليها معنى و كل واحد بيفهمه بطريقة .... ربنا معاك ... أقولك حاجة بيع الشنطة ..
  23. Anonymous Anonymous posted at 11:00 AM  
    لللأسف مبادرة حاسب لكل بيت وانتشار وصلة النت المجانى خلتنا نشوف لاوى وواضح أنك من ضمن البلاوى دى
    أولا يا بشمهدس ممكن يوكن الموضوع فوق مستوى تفكيرك وده واضح من ردود أفعال أصحابك اللى كلهم موافقين على رأيك لأن كل واحد بأصحابه ومن الواضح إنكم كلكم بالصلاة ع النبى كده تربية ميكروباصات وآخركم تفكروا بالمعانى الواضحة والسطحية زلكن عايز أسألك سؤال
    تفتكر مثلاً مثلاً إنك ممكن تقيم عمل أدبى بشكل أحسن من بهاء طاهر
    أنا مش هاقيم كلامك ولأ أرد عليه بشكل أدبى أو موضوعى لأنه فى الأخر كلام فاضى لواحد فاضى بس عايز أقولك إن القصة دى مش مفرقعة فجأة ولا حاجة القصة دى فى مصر من سنة 94 بس واضح إن حضرتك كنت مسافر أو مشغول فى طوابير البانجو وأكيد أخر أسطورك الذاتية هو الحصول على طن من النبات العجيب
  24. Blogger S H E B A K posted at 8:36 AM  
    الاخ هانى ... تعليقك لاقى اهتمام كبير و كتبت بوست مخصوص عشانه
    و عرضت رأيك على مساحة اكبر من الناس

    http://shebak.blogspot.com/2008/04/blog-post_23.html#comments

    شكرا و ارجو المتابعة
  25. Blogger The Great Pretender posted at 12:44 PM  
    الأخ هاني:
    والله الواحد مش عارف يبدأ منين في الرد علي الضرر المكتوبة.
    بس واضح إن سيادتك جديد علي التكنولوجيا.
    ربنا نفسه يا سيد الناس معترضة عليه. فمفيش مانع ابدا إننا نعترض علي إبن المتناكة ده و ده ميزعلش حد.
    أما طريقتك في عرض رأيك فده يدل علي إضطلاع واسع و ثقافة جمة, و قدره مهولة علي إقناع الناس بهبلك.
    و بالنسبة للبانجو فده تبرمه و تحطه عندك (طبقاً لطلبك بتجنب الموضوعية.
    و شكرا لرأيك روح لأمك
    طلب من الأخ العزيز شباك:
    وضع الجملة الأتية علي مدخل البلوج:
    ممنوع دخول البهايم و ذوي الإحتياجات الخاصة و المعاقين ذهنياً
    و شكراً
  26. Blogger The Great Pretender posted at 12:56 PM  
    نسيت اقةل حاجة مهمة:
    أعلي من طريقة تفكيرك إيه يا أبو تفكير يا تربية الميكروباصات يا... (مش لاقي حاجة أقولها)
    مش لاقيلك صفة.
    الكلام و الصفات التوفرة في كل اللغات لا تسعفني...
  27. Anonymous Anonymous posted at 1:26 PM  
    ربنا اية وبتاع اية يا عم؟؟
    ياخواننا بلاش الزيطة دية
    الراجل قال رأية بما فية الكفاية من الحمورية و قلة القيمة
    و علي الرغم من ذلك الأخ شباك بية عرض رأية علي مساحة أكبر للمناقشة ..
    ونعم الأخلاق و الشفافية ..
    شغل بقي الزييطة بقي بتوع الأفراح والخناقات دة .. ان دل فهو يدل علي ان الشخص الشاذ "جريت بريتندر" تربية ميكروباصات فعلا ..
    و علية طبعا خرج الموضوع عن نقد الكتاب و الكاتب و روح العالم و شنطة المثقفين و حيقلب عركة في خمارة رخيصة
    احسنت فعلا يا شباك بالموضوع و بالرد علي الأفندي الحمار هاني
    و بالنسبة للزييط ..
    انت بضان
  28. Anonymous Anonymous posted at 1:27 PM  
    ربنا اية وبتاع اية يا عم؟؟
    ياخواننا بلاش الزيطة دية
    الراجل قال رأية بما فية الكفاية من الحمورية و قلة القيمة
    و علي الرغم من ذلك الأخ شباك بية عرض رأية علي مساحة أكبر للمناقشة ..
    ونعم الأخلاق و الشفافية ..
    شغل بقي الزييطة بقي بتوع الأفراح والخناقات دة .. ان دل فهو يدل علي ان الشخص الشاذ "جريت بريتندر" تربية ميكروباصات فعلا ..
    و علية طبعا خرج الموضوع عن نقد الكتاب و الكاتب و روح العالم و شنطة المثقفين و حيقلب عركة في خمارة رخيصة
    احسنت فعلا يا شباك بالموضوع و بالرد علي الأفندي الحمار هاني
    و بالنسبة للزييط ..
    انت بضان
  29. Blogger ربيع posted at 12:34 PM  
    المهم اني كل ما أدخل هنا اتفشخ من الضحك ، يا عماد هي الناس دي بتطلع عليك منين؟ انت جاذب للعبط يا أخي ، و الشاذ اللي اسمه جريت بريطنضر ، يا شاذ ، يا هومو احيه انا اصلا مفشوخ ضحك و متخيلك دلوقتي متنرفز و متزرزر ،

Post a Comment

« Home