فى مصيبة فى البلد دى مظنش انها هتتحل ولو بعد 100 سنة ,ألعن من الفساد .. مشكلة انك تحترم رأى حد تانى و تسمعة منغير ماتقولة انت حمار و انا اللى بفهم انت متقدرش تقبل ان يكون فى حد رأية غير رأيك ... لازم كل الناس تتفق على ان الشئ ده وحش او حلو ... لازم تقنع اى حد مختلف معاك انه غلط و انت اللى صح ...و لو مقتنعش لازم تهزقة و تعرفة انه حمار و ميساويش ... دى رسالة كل انسان مثقف فى البلد دى ... لازم يقنع كل اللى مختلفين معاك فى الرأى انهم حمير .. و يحاول بقدر الامكان انه يستخدم بقدر الفاظ تدل على اصلة العربجى يا بنى ادم ... تذوق ام الفن شئ نسبى ... و دى احسن حاجة فيه ... انك ممكن يعجبك كاتب قد الدنيا و تقول علية عظيم و ممكن تقول علية زبالة مع انه مشهور و كل الناس بتحبة ... انا حر ... معجبنيش ... و هقول انه معجبنيش ... مرحتش اقول كده فى ندوة أدبية ... انا قلتها فى مساحتى من النيلة الحرية على الزفت الانترنت... الله يلعن الدى اس ال ليه لازم نبقى احنا او الناس التانيين ؟ ...ليه ميتين ام رأيك او الرأى الاخر و يبقى عدوك .. ليه ميبقاش فى خمسين رأى فى كل موضوع عشان ميتين ام البنى أدمين مختلفين فى افكارهم؟!!! ... مش لازم ابقى زفت مقولب فى قالب من القالبين اللى حضرتك مقررهم ليا ... يا اهلى يا زمالك... يا معاك يا مع الناس التانيين ... مش عايز امشى فى قطيع الخرفان بتاعكم يا اخى ... مضايقك اوى انى مختلف ؟؟!!! ...و انت خروف؟... دى مش مسئوليتى
من فترة كتبت بوست عن رأيي فى رواية السيميائى .. من ساعتها مبطلتش أتشتم فى التعليقات .. ده مكانش مضايقنى ... لكن حابب اعرض حاجة مختلفة المرة دى اولا احب ابارك للاخ هانى على جهاز الحاسب بتاعة اللى تبع حاسب لكل بيت (و اقدر اخمن من ده انه عنده بيت) و احب اباركله كمان على وصلة السيبر ... و عايز اعرض تعليقة المثير للاهتمام على البوست
هانى : لللأسف مبادرة حاسب لكل بيت وانتشار وصلة النت المجانى خلتنا نشوف لاوى وواضح أنك من ضمن البلاوى دى أولا يا بشمهدس ممكن يوكن الموضوع فوق مستوى تفكيرك وده واضح من ردود أفعال أصحابك اللى كلهم موافقين على رأيك لأن كل واحد بأصحابه ومن الواضح إنكم كلكم بالصلاة ع النبى كده تربية ميكروباصات وآخركم تفكروا بالمعانى الواضحة والسطحية زلكن عايز أسألك سؤال تفتكر مثلاً مثلاً إنك ممكن تقيم عمل أدبى بشكل أحسن من بهاء طاهر أنا مش هاقيم كلامك ولأ أرد عليه بشكل أدبى أو موضوعى لأنه فى الأخر كلام فاضى لواحد فاضى بس عايز أقولك إن القصة دى مش مفرقعة فجأة ولا حاجة القصة دى فى مصر من سنة 94 بس واضح إن حضرتك كنت مسافر أو مشغول فى طوابير البانجو وأكيد أخر أسطورك الذاتية هو الحصول على طن من النبات العجيب
جربت تحاول تنام الضهر و انت بتتمنى من كل قلبك انك متصحاش تانى ابدا ؟ ...و ينتهى الموقف بأرق و قريفة و يضيعوا حتى الساعتين اللى كان نفسك تهرب بيهم من الدنيا شوية؟
انا الان فى حاله انبهار بعد مشاهدة الفيلم ... كنت مستنى اشوف ازاى ممكن مخرج زى بول توماس اندرسون المتطور فى استخدام ادواتة و صاحب الايقاع المميز فى أخراج فيلم تدور أحداثة فى اوائل القرن الماضى ... يمكن مفيش علاقة و يعتقد البعض ان إيقاع الفيلم مالوش دعوة بزمن الاحداث ... مكنتش متأكد من ده خصوصا لما تشوف فيلم زى حليم مثلا الكاميرا طول الوقت تطفو ... مش عارف لية مكنتش مصدق عبد الحليم مع الاسلوب ده فى الصورة ... المهم ان فى الفيلم ده قدر بول اندرسون يعمل حاجة جديدة مختلفة عن اللى عملة قبل كدة و يظل الفيلم مبهر جدا دخلت الفيلم فى السينما و مع فيلم زى ده انا مستنية من فترة فالسينما اظرف كتير من الفرجة على نسخة على الكومبيوتر ... و كعادة السينما فى مصر , هم يتلاعبون بمواعيد العرض بشكل يشبة المؤامرة ... وصلت بالساعة تسعة الا خامسة مع صديقى لحضور عرض الساعة تسعة ! .. منطقى مش كدة ؟ .. قالولنا العرض عشرة و عشرة ... ضيعنا حوالى ساعة و دخلنا الصالة عشرة الا خمسة لقينا الفيلم بدأ ... حاجة نكد الصراحة انا كدة مشفتش البداية المهم الصالة بها شلة شباب و عائلتين مثلا و الكثير من ربات البيوت ... حتى منتصف الفيلم و الجميع هادئ ثم بدأ يضجر الشباب ثم تتململ ربات البيوت ... انا شايف ان الفيلم كان يشد جدا ... و رغم نعاسى الشديد الا انى لم استطع ان التفت .. لكن المشكلة هى ان الفيلم بأبطاله و حبكتة مختلف ... لا اعلم من أتى ابن الجنية بهذة القصة ... لكن مع الاسف هى ليست فى مستوى المشاهد المتوسط ... احظر سيدى الاحداث من خارج المنهج .. لا تبحث عن البطل اللذى تتعاطف معه ... فالكل أوغاد يمكن اتكلم تانى عن الفيلم بعد مشاهدة ثانية متأنية ... لكن لحد ما ده يحصل ... انا منبهر من الاخراج ... منبهر من مزيكة جونى جرين وود (من فريق راديوهيد سبق و ذكرت انه هيعمل مزيكة الفيلم ده) الغير تقليدية ... منبهر من العبقرى المخضرم دانيال داى لويس (مالوش حل) و العبقرى الصغير بول دانو (أذكرة من الفيلم المميز ايضا
مفيش حاجة اسمها زمن الفن الجميل... دى جمله اخترعها التليفزيون المصرى عشان يفضل يعرض الحاجات اللى عنده فى الارشيف و يدارى كسله انه يدور على الفن الموجود دلوقتى
ولو حضرتك مقتنع ان كان فى فن جميل و مش موجود دلوقتى يبقى انت محتاج تبطل تتفرج على التليفزيون و تدور على الناس اللى بنتحاول تعمل حاجات كويسة فى حتت تانية
فى فيلمة التسجيلى الاول Super Size Me يقرر Morgan Spurlock انه هياكل لمدة شهر كامل الثلاث وجبات كاملة من ماكدونالدز ... فى البداية انا شخصيا كمشاهد اعتبرت ده نوع محاولة استفزاز مشاعر شخص أكيل مثلى و ان انا ممكن بمنتهى البساطة اعمل فيلم شبهه لو اتوفرتلى وجبات ماكدونلدز زى اخينا ده ... فين الفيلم فى الموضوع اصلا!! ... لكن الفيلم فعلا يشد ... لان الاخ ده بيحكى ايه اللى بيحصله صحيا طوال الشهر ده و الاضرار اللى تعرضلها قرب نهاية المدة و ده بشكل تسجيلى ... بيروح لدكاترة فعلا بيقيسوا حالته الصحية قبل و اثناء و بعد الشهر ده ... العجيب ان شخص ممتاز صحيا يتحول بعد شهر واحد ماكدونالدز لشخص يقرب على الموت تقريبا ... الفيلم ده اخد جوايز كتيرة ابرزها جائزه احسن مخرج فيلم وثائقى عام 2004 من مهرجان ساندانس
أما فى فيلمة الجديد ?Where in the World Is Osama Bin Laden قرر استاذ مورجان انه مش واثق فى المارينز الامريكانى و اقمار التجسس و كل الكلام الفاضى ده و انه هيروح بنفسة يلف الشرق الاوسط يدور على اسامه بن لادن ... على اساس ان اللى يسأل ميتهش و دى طبعا طريقة بوش معملهاش عشان هو بيتكسف يسال و كدة ...المهم انه فى بداية الفيلم بيقولك ان مراتة حامل و هيكون اب قريب (عقبال عندكم) و ده مخليه يفكر فى توفير السلام و الامان على الكوكب اللى هيستقبل المحروس و بالتالى البحث عن اكتر شخص مطلوب بتهمة الارهاب فى التاريخ ... طبعا البقين دول كلام فاضى ...
الفيلم عرض ايضا فى نفس المهرجان السنة دى ... و بيقول بعض النقاد عنة ان فيلم دمه خفيف بالرغم من انه مجاوبش على السؤ ال اللى بيطرحة ... بينما نقاد تانين شايفين ان الفيلم عبارة عن كوميديا بهتانة و تكلفة مبالغ فيه و لعب على تيمة شغالة كويس اليومين دول و هى الشرق الاوسط
أنا عن نفسى مستنى اشوفة على سبيل الفضول و معجب بالبوستر اللى بيقلد Indiana Jones اللى بالمناسبة هينزل منه جزء جديد السنه دى ... العب يا هاريسون و وريهم :)
كام مرة قعدت قدام فيلم سئ تتابع بمنتهى السعادة ؟!... للافلام السيئة سحر ما , يمكن لانك بتستغرب ازاى فى ناس ممكن تعمل كوارث و اخطاء مضحكة كدة و ضميرها مرتاح جدا لان ده فيلم سينما يا جماعة... و يالا يا ناس تعالوا اتفرجوا
ايد وود Ed Wood مثلا هو واحد من اهم الاسماء فى عالم السينما على مر التاريخ , لن تجد اجماع عالمى من النقاد و الجمهور على مركز هذا المخرج فى قوائم ترتيب المخرجين فى العالم ابدا , فهو و بجدارة يحتل المركز الاخير و يلقب بأسواء مخرج فى العالم , حتى ان ثلاثة من افلامة حصدت مراكز مرموقة فى قائمة اسواء 50 فيلم فى التاريخ ... شخصية مثيرة للاهتمام فعلا (ازاى الراجل ده قدر يعمل كم السفه ده !!!) ... حتى ان هوليوود ذاتها اهتمت بصنع يديها و انتجت فيلم ED WOOD بطولة Johnny Depp
جرب تتفرج على جزء من رائعتة السينمائية Plan 9 from Outer Space ... الفيلم حلو فعلا :) التمثيل مسخرة و غطيان حلل على انها اطباق طائرة و اخطبوط كهربائى بايظ و حاجة فل على الاخر
أما troll ذلك الكائن المزعج كريه الشكل يحتل المركز ال 48 فى نفس القائمة بفيلمة الذى يحمل نفس الاسم ... و الكوميدى فعلا فى الفيلم ده ان صناع الفيلم متعلموش من الغلطة او المصيبة اللى عملوها ...بل و عملوا جزئين كمان من الفيلم ليتحفوا العالم بكم اكبر من العبط فى ثلاثية يخلدها التاريخ troll , troll2 , troll3 شاهد هذة الاجزاء من التحفة الفنية troll2 , لاحظ مستوى التمثيل ... لتكتمل لديك الصورة
هذا الجزء(troll 2) بالذات يعتبره البعض (احسن اسواء فيلم) فى العالم ...حتى انهم قرروا اعادة عرضة فى السينمات و عمل فيلم تسجيلى عن الفيلم و ابطالة و صناعة و اعادة لم شمل فريق العمل مرة اخرى ليحكوا عن الفيلم و ذكرياتهم عنه شئ مثير فعلا .. أحسن اسواء فيلم !! ... و بالفعل ... اقبال جماهيرى عظيم .. ناس منبهرين بالفيلم لدرجة انهم يصرخون امام دور العرض (ده اعظم فيلم فى العالم ) :) هنــــا موقع معجبين الفيلم ( الكلام بجد يا جماعة .. اعجاب فعلا ) .... و شاهد هنا جزء من الفيلم التسجيلى عن الفيلم
شكرا لجار القمر على نسخة فيلم ed wood و معلوماتة عن المخرج ed wood ذاتة
يعتقد البعض ان إيقاع الفيلم مالوش دعوة بزمن الاحداث ... مكنتش متأكد من ده خصوصا لما تشوف فيلم زى حليم مثلا الكاميرا طول الوقت تطفو ... مش عارف لية مكنتش مصدق عبد الحليم مع الاسلوب ده فى الصورة ... المهم ان فى الفيلم ده قدر بول اندرسون يعمل حاجة جديدة مختلفة عن اللى عملة قبل كدة و يظل الفيلم مبهر جدا 
يضجر الشباب ثم تتململ ربات البيوت ... انا شايف ان الفيلم كان يشد جدا ... و رغم نعاسى الشديد الا انى لم استطع ان التفت .. لكن المشكلة هى ان الفيلم بأبطاله و حبكتة مختلف ... لا اعلم من أتى ابن الجنية بهذة القصة ... لكن مع الاسف هى ليست فى مستوى المشاهد المتوسط ... احظر سيدى الاحداث من خارج المنهج .. لا تبحث عن البطل اللذى تتعاطف معه ... فالكل أوغاد 
