Sunday, January 28, 2007

children of men



Children of men هو فيلم مرشح للأوسكار عن احسن سيناريو مأخوذ عن عمل أدبى و احسن تصوير و احسن مونتاج , هذة المعلومة كانت كافية بالنسبة لى للبحث عن الفيلم و مشاهدتة , منذ اول لقطة فى الفيلم لاحظت ان الصورة مميزة و المونتاج لطيف و المخرج نفذ لقطات ال*one shots المبهرة (دائما) بشكل محترم وهو تكنيك احترمة جدا خصوصا اذا تم تنفيذة باحتراف , حتى جائت المفاجأة المذهلة !!! ... لقطة one shot مجرمة عدتها كذا مره عشان احاول اتأكد ان المخرج عمل كدة فعلا ... لقطة معقدة جدا و طويلة (مدتها حوالى 4 دقائق كاملة) بدون قطع (الا اذا كان بيقطع بصياعة و حرفيه انا مش قادر افهمها !!) ... غير تنفيذ التصوير و الحركة فى اللقطه فان اداء الممثلين متزامن جدا مع الاحداث ... فعلا اللقطة مقنعة جدا






تمام ؟ .. طاااب ... ايه بقى ؟؟؟ هاه ؟؟!!! ... حد عارف الخيال العلمى ده اتعمل ازاى ؟ .. قطع ولا لاء ...ولا ايه ؟!!! ...

بالمناسبة المخرج مشارك فى المونتاج بنفسة , و معلومة ان الفيلم مرشح لاحسن مونتاج محسسانى ان ممكن يكون اللقطات دى فيها مونتاج عبقرى مثلا..او حاجة !!!


غير هذة اللقطة هناك لقطة اخرى قرب أخر الفيلم one shot ايضا اكثر تعقيدا و صياعة , لكننى اخترت ان اقتطع اللقطة السابقة لانى اعتقد انها قد تكون اقل فضحا لاحداث الفيلم

*One shot هى لقطة واحد يتم استخدامها كاملة فى المونتاج
بدون اى قطع
_____________________________________________________________________

تعديل:
- يبدو أن مصطلح one shot ليس دقيقا بالشكل الكافى .. المصطلح الاقرب للمقصود هنا هو Long take
- هنا شرح لتنفيذ اللقطة , ويقول انه تم استخدام Doggicam ,الى جانب سيارة تسمح بان تتحرك كراسيها (بالجالسين عليها) لتسمح للكاميرا وطاقم تصوير كامل بالتحرك بحرية ... تكنولوجيا متوحشة !!!!



Labels:

Posted by S H E B A K at 12:50 AM



11 Comments

  1. Anonymous Anonymous posted at 4:03 PM  
    أنا خايف أشوف اللقطة تحرق عليه حاجة في الفيلم !.. اشوفها عادي و لا ايه النظام يا بوب ؟

    بس ايه المشكلة في أربع دقائق ؟.. هي طبعاً صعبة بس اتعملت قبل كده كتير.. الفيلم القصير "صباح الفل" من اخراج شريف البنداري و بطولة هند صبري عبارة عن
    One take
    تسع دقائق كاملة.. هو كان عاوز يعملها مرّة واحدة بس كانت هناك صعوبات في الحصول على بكرة سينما بالطول ده وقت الفيلم فعملها على بكرتين كل واحدة بتشيل خمس دقائق و شوية.. يعني التسع دقائق فيهم قطع واحد فقط في النص و مستخبي في حتة حلوة قوي. الفيلم روعة و لازم تشوفه.. أنا ناوي أدون عنه قريب إن شاء الله.

    طبعاً مش عاوز مونتير بس ، لازم المخرج يبقى جامد و عامل ميزانسين ابن جزمة. و الممثل كمان لازم يكون جامد و فاهم علاقته بالمكان اللي حواليه، في الماكنج أوف بتاع فيلم شريف البنداري بتشوف ان فيه ناس ماشية ورا هند صبري بيفكروها بحاجات.. و بتسمع صوت شريف البنداري و هو بيقول لها "خدي اللفة على أوسع" و حاجات كده .. ده غير البروفات. طبعاً صعب جداً ان الممثل يبقى ماشي كده المفروض إن عرفيت الشخصية لابسه و كمان فاكر الديالوج بتاعه و في نفس الوقت في ناس صوتها عالي وراه بتكلمه. هند صبري كانت أكثر من ممتازة في الفيلم ده يا شباك.. فعلاً أقوى ممثلة في مصر بلا نقاش.

    على فكرة أنا كمان باموت في الـ
    one takes
    في فيلم فرنساوي بتاع مونيكا بيلوتش أكيد شفته.. اسمه إررفيرسابل، لو مش عارفه اسأل شريف زهيري هو عارفه. الفيلم عبارة عن سلسلة من الـ
    one takes
    و كل واحدة فيهم بتاع 10 دقائق ربع ساعة من غير قطع.

    شريف البنداري قال لنا بعد عرض الفيلم ان فيه فيلم روسي كامل عبارة عن لقطة واحدة مستمرة.. تخيل !!!
    كنت عاوز أدور عليه و نسيت، بس قشطة سهل العثور على اسمه عالنت.

    أنا باحب جداً اللقطات الطويلة اللي موجودة في أفلام :

    kill bill
    الحتة و و هي رايحة تقتل أورين إي شي اليابانية.

    goodfellas
    لقطة بطل الفيلم و هو واخد البنت صاحبته يعزمها على العشا و داخلين من الباب الوراني.. ماشيين و حواليهم طباخين بيطبخوا و حلل بتعدي و ناس بتسلم عليهم و دوخة !

    War of the Worlds
    و دي بقى لقطة مصيبة !! تصور اشتري الديفيدي بستة و و تلاتين دولار يا مؤمن و ألاقي الماكنج بتاع دي هو الحاجة الوحيدة اللي مش حاطينها.. أصلها كانت بنت ستين كلب غريبة.. داخل فيها جرافكس و شغل ابن جزمة.. و هو هربان مع ولاده بالعربية.. كل الحوار ما بينهم عبارة عن لقطة واحدة متصلة.. الكاميرا بتنزل عليهم و تبعد برة العربية و ترجع العربية تاني و تقوم داخلة من الشباك الوراني معدية من جنب البنت الصغيرة و تخرج من الشباك اللي قدامه و تلف حوالين جسم العربية و حاجات كده بنت حراااااام !

    سوري لو استرسلت بزيادة.. أصلك جبت سيرة موضوع باحبه قوي :)
  2. Blogger Unknown posted at 9:45 PM  
    ازاي عملها ابن اللئيمة؟ أنا شفته ييجي ست مرات و ما فيش ولا حتة ممكن تكون ملزوقة . الخلاصة ده مش بني آدم.


    قد ترغب في زيارة مدونتي الرضيعة
  3. Blogger Solo posted at 12:23 AM  
    زى ما قال شريف نجيب فكرة اللونج تيك مش جديدة , الرّك من وجهة نظرى على اللى بيحصل فيها , و فى ذوقى الشخصى الرك على التكنيك المتنفذة بيه اللقطة .. مش المعدات عشان أعرف أستمتع باللقطة الطويلة صح
    يعنى تصوير لقطة
    war of the worlds
    لا تمثل لى أى متعة و لو اللقطة اللى جبتها يا شباك طلع فعلاً ان اللى بيحصل فيها بره العربية عبارة عن كروما متقنة هاتبقى قهرة جامدة بالنسبالى زى ما قلتلك
    يمكن عشان كده استمتعت بتنفيذ "صباح الفل" أكتر , لا معدات و لا خره و لا كروما و لا جرافيكس و لا بلاء أزرق من ده , فكرة بسيطة و مخرج صاحى اتنفذت اللقطة - و الفيلم بالتالى - بجمال
    عموماً السيما أذواق و مذاهب و مِلَلْ و نِحَلْ
    :)
    الفيلم الروسى اللى كله متصور وان شوت اسمه
    Russian Ark
    انتاج 2002 , بس دا متصور ديجيتال هاى ديفنيشن و ما واجهتش المخرج فيه مشكلة طول بومبينة الخام بتاع السينما زى ما حصل فى "صباح الفل" , المشكلة اللى واجهته انه مضطر يسجل اللى بيصوره أول بأول عشان الفيلم كان ساعة و نص من غير التترات , فوصّل الكاميرا بهارد ديسك مَهُول يسّجل اللى بيصوره فى لحظتها
    افتكر برضه انى قريت ان الفيلم دا اتعاد تصويره تلت مرات لغاية ما اكتمل تماماً من غير غلطات فى المرة الرابعة
    :)
    برضه تصوير "صباح الفل" رغم بساطته أمتعنى أكتر من اللونج تيك اللى فـ
    Goodfellas
    يمكن عشان مساحة الشقة اللى كانت بتتحرك فيها هند صبرى أضيق كتير من الممرات الواضحة اللى فـ
    goodfellas
    و بالتالى محتاج حرفية انما الميزانسين البسيط اللى كان بيتحرك فيه لاى ليوتا و صاحبته و هما داخلين المطعم كان عبارة عن ممر ملتوى طويل و حركة بين ترابيزات , دا غير انه استعراض عضلات مالوش لازمة فنية فى رأيى من سكورسيزى , طبعاً التحكم فى لوكيشن تصوير بالحجم دا مشكلة و محتاج حرفنة بنت كلب بس ما عملتليش مفاجاة و ما اخدتنيش معاها أوى ... هأقول ايه !! السينما على بعضها خلْطة لازم يكون فيها نَفَسْ المخرج
    ----
    و أخيراً أكيد لفظة
    long take
    أدق كتير لوصف اللقطات اللى بنتكلم عنها
  4. Blogger bo2bo2 posted at 10:22 AM  
    ana akeed maleesh feha we ba bo2 :)
    bass when u look at lighting inside the car it feels to real.. too perfect, which makes me believe it's studio lighting

    I'd go with all on the out side is perfectly merged chroma

    i can't shake the feeling of naguib el ree7any shaking the steering wheel right and left

    also there must be a place for some kind of equipment to move inside the car when it's being driven

    i think it's perfect if it hung through the windshield
  5. Blogger Abd El Rahman Magdy posted at 2:17 AM  
    لقطة حلوة جدا
  6. Anonymous Anonymous posted at 9:28 PM  
    أنا أحسدك
    أنا احسدك
    أنا
    أ
    ح
    س
    د
    ك
  7. Blogger www.blogs4arab.com posted at 9:47 PM  

    يسعدنا تشريفك
    www.blogs4arab.com
  8. Blogger ربيع posted at 1:32 PM  
    عمي عماد
    مش داخل دماغي حتة ان كل ده لقطة واحده و صواريخ بتفرقع و نار بتولع ، المرة دي مبالغة شوية
    هما في الحقيقة لقطتين ، واحده مصورة اللي بيحصل بره العربية ، الكاميرا كانت فيها محطوطه على ستاند بيجري على الطريق ، و ممكن تكون متصوره مرة واحده أو على مرات ، مش هاتفرق ، لأن المصور طول الوقت بيغير في زووم العدسة ، مرة يزوم على اللي جوه العربية و مرة يزوم على اللي بره ، مش بس كده ، هو بينغبش على الصورة الخارجية في بعض الأحيان ، لما يحب يقطع أو يمنتج مشهد في مشهد ، الموضوع ده باين أوي في اللقطة اللي بتبين عربية البوليس و هي بتقرب منهم ، الصورة من خلال الشبابيك واضحه تماما ، و من خلال القزاز الخلفي كانت واضحة و بدأت تتنغبش بالتدريج ، لغاية ما تبقى ضبابية تماما ، ازاي ممكن تبقى الصورة ضبابية من القزاز الخلفي و واضحه تماما من الشباك؟ دي الغلطة الوحيدة في اللقطة
    بعد كده بتبدأ الصورة توضح من القزاز الخلفي ، العربيتين يقفوا تماما ، و القطة المتصورة سابقا بتاعت خارج العربية تبين اتنين ظباط بيتحركوا ناحية جنب السواق ، المخرج هنا بيستغل القايم الخلفي اليمين بتاع العربية عشان يوقف اللقطة المتصورة سابقا ، و يدخل اتنين ممثلين بلحمهم للقطة الأساسية ، اللي هي بتصور الخمسة داخل العربية ، لقطة ضرب النار بتصور سبعة أشخاص في وقت واحد ، اللي قبل كده كله بيصور خمسة في وقت واحد اللي هما جوه العربية ، و الباقي متصورين في لقطات تانية و اللقطيتن متركبين على بعض
    أظن انه ممكن دلوقتي تصور لونج شوت ديجيتال ، يعني مش صعبة قوي ، سنة 2000 كان فيه فيلم رهيب اسمه Time code
    تخيل لونج شوت لأربع كاميرات بدون منتاج على الاطلاق ، النكتة ن الأربع كاميرات بتتلاقى في بعض المشاهد ، بس الباقي كله منفصل ، ازاي عرضوا أربع لقطات مع بعض؟ بسيطة ، قسموا الشاشة لأربع مربعات
  9. Blogger zoof posted at 6:21 AM  
    يعنى احنا نعمل ايه طيب .. ننزل كل الافلام دى ازاى ..

    هجيب مساحة منين انا لكل ده !!1

    راعى مشاعرنا يا اخى ..

    انا طبعا شوفت اللقطه كذا مرة ..واكيد مش هعرف افرق ..

    بس شكله فيلم حلو ..

    واكيد مش هقولك شكرا عشان همسح حاجة من عندى..1
  10. Blogger moudi posted at 10:39 PM  
    السلام عليكم يا شباب اية الاخبار ؟

    يا جماعة انا متشكر جدا جدا علي كل الاستفادة اللي اسفدتها منكم و الف شكر يا شباك علي عرضك للموضوع و شكر يا شريف نجيب انك اتكلمت عن شريف البنداري و علي فكرة انا ليا الشرف اني اعرف البنداري و لو تسمح اني اتكلم عنة و عن الفيلم صباح الفل اول فيلم روائي قصيرة لة و عن فيلمة التسجيلي 6 بنات

    تـاريـخ الإنتـــاج :
    2005 مدة العرض 8ق سينما

    إنتــــــــاج :
    المركز القومي للسينما

    إخــــــــراج :
    شريف البنداري ( عمل أول )

    سينـــاريــــو :
    فيروز كراوية

    تصـــــــوير :
    أحمد جبر

    مونتــــــــاج :
    منى ربيع

    موسيـــــــقى :
    -

    الملخــــــــص:
    سيدة تبحث عن مفتاح شقتها قبل نزولها في الصباح وهي في عجلة من أمرها تتذكر من خلال بحثها يومها السابق لنعرف من خلال تذكرها تفاصيل عن حياتها .



    شريف البنداري :


    - مواليد 1978 شبرا – القاهرة

    - تخرج من كلية الفنون التطبيقية – قسم النسيج يوليو 2001

    - التحق بالمعهد العالي للسينما قسم الإخراج سبتمبر 2002 حيث أنجز على مدار سنوات الدراسة عدة تدريبات روائية قصيرة منها ( يحكى أن ... ) .

    -عمل مساعداً للإخراج في عدة أفلام روائية طويلة .

    - "6 بنات .. " أول أفلامه التسجيلية وهو مشروع الفرقة الثالثة له بالمعهد العالي للسينما وشارك به في عدة مهرجانات دولية منها :

    - مهرجان الفجيك – موسكو أكتوبر 2005

    -مهرجان دبي السينمائي الدولي ديسمبر 2005

    - "صباح الفل" أول أفلامه الروائية القصيرة .


    حوار الفيلم:

    من خلال مونولوج طويل أو 'مونودراما'.. أدتها الفنانة المدهشة هند صبري.
    يروي الفيلم بإيقاع سريع وحيوية وفطرية وعذوبة يتسم بها أداء هند صبري.. أحداثا تتكرر صباح كل يوم لامرأة شابة تستيقظ لتغسل وجهها وترتدي ملابسها وتصب اللبن في 'البزازة'.. تفعل ذلك وهي تحدث نفسها أو تحدث رضيعها: يالله يا كت كت لحسن اتأخرنا.. تحمله من فراشه ثم تصيح في حب ودلع.. يووه انت عملتها تاني وأنا لسه مغيرالك حالا.. تأخذه إلي الحوض تشطف مؤخرته وهي تردد كل شوية كده يا مطرطراتي انت.. تجفف جسده وساقيه وتحيطه بملابسه وتضعه علي فراشها وتقول والنبي تشهد علي ابوك.. اللي ماهانش عليه يعلق البيجاما وراميها ع السرير.. تتناول ملابسها وتكمل.. وكمان ماشدش السيفون لما ريحة الشقة بقت ايه!.. تضع ذراعها في الكم وتقول أدي الجاكتة.. وتلف رقبتها وتقول وادي الكوفية.. تضع يدها في جيبها وهي تصيح بينما تعكس الكاميرا تعبيرات وجهها: آه.. المفتاح!.. هي كل يوم حكاية المفتاح دي.. ترفع أشياء وتفتح أدراج.. لأ.. مفيش.. ولا هنا.. لازم افكر أنا عملت ايه بالظبط لما جيت.. تتجه إلي باب الشقة.. دخلت من الباب والمفتاح في ايدي.. الواد كان علي دراعي اليمين وازازة اللبن تحت باطي.. ايوه تحت باطي.. حطيت الواد ع السرير واللبن في التلاجة.. لازم المفتاح كمان في التلاجة.. تفتح التلاجة.. ولا المفتاح ولا اللبن حتي في التلاجة.. تجلس علي الفراش في ضيق وقد تذكرت عندما دق زوجها الباب بعنف وهي تسرع تفتحه وتقول: هو انا يعني كنت ورا الباب!.. يدخل ويتشاجر معها.. تهمس لنفسها: كل يوم بيفوت زي التاني!.. تبدو تفكر ثم تكمل: مش كفاية الدنيا يا عطية!.. تبتسم وهي تقول: طب ده أنا كنت عاملة زي العبيطة وأنا باتدلع عليك في السرير.. ثم تصرخ وهي تقفز: المفتاح! تضع يدها في جيب جاكتة زوجها.. يبتسم وجهها كله وهي تخرج مفتاحين وتصيح: اهوه.. مفتاحي ومفتاحه.. احسن عشان لما ييجي مايعرفش يدخل!.. يالله يا كت كت.. خلاص حنمشي.. تحمل الطفل وتتجه إلي باب الشقة.. تمد يدها جانبا وتجذب ورقة من النتيجة كالعادة قبل ان تخرج.. يقع نظرها علي الورقة التالية.. يا خبر.. النهاردة الجمعة.. ايه يا كت كت ده مش كنت تقول ان النهاردة الجمعة.. يوم الجمعة الناس بتنام وتشخر.. يا ريت كل يوم يبقي جمعة.. الاثنين جمعة والتلات جمعة ولاأربع جمعة.
    وتطفأ الشاشة!

    و عن شريف البنداري

    ولد في القاهرة عام 1978، تخرج من كلية الفنون التطبيقية عام 2001، وعمل مهندس نسيج ،شارك في العديد من الأعمال المسرحية في المسرح الجامعي بالإضافة إلى مشاركته في بعض المعارض الجماعي، إلتحق بالمعهد العالي للسينما ليدرس في قسم الإخراج عام .2002

    أخرج أفلاما قصيرة ضمن مشاريع معهد السينما وفيلما للمركز القومي للسينما

    شارك بالفيلم التسجيلي ( 6 بنات ) بمهرجان الفجيك لأفلام الطلبة بموسكو ومهرجان دبي السينيمائي الدولي 2005

    - مهرجان معهد جوته لأفلام الطلبة 2006

    حاز فيلمه" صباح الفل " على جائزة لجنة التحكيم بالمهرجان القومي للسينما مصر 2006 و جائزة معهد جوته لأفضل فيلم تسجيلي 2006 عن فيلم ( 6 بنات )

    و تم اختيارة في مهرجان برلين 2007 من ضمن المخرجين الشباب ليتم مناقشة افلامة و عرضها و هم

    الفيلم الروائي "صباح الفل" و الفيلم التسجيلي " 6 بنات".

    طبعا انا اسعدني كثير اني كنت اشتغلت مع شريف في حوار لمجلة كلمتنا و ان شاء الله الحوار هايتنشر الاسبوع اللي جاي و دة اول حوار يتنشر ليا منذ 3 سنين بعد محاولات عديدة للالتحاق بالمجلة او نشر اي مقالة للعبد الله . دة سؤال من ضمن الاسئلة اللي سئلتها لشريف و دة
    هايبين اد اية شريف انة فنان فعلا جامد

    : هل استفدت من المخرجين الذي عملت

    معهم مساعد؟


    اكيد طبعا بس في حاجة مهمة استفدتها اكثر و هي " خبرة ال location وهي كيفية التعامل مع الcast وال
    Crew و يوجد امتحانات بتعدي كل يوم علي المخرج مثلا لو في يوم تم عمل معاينة علي مكان و جاء و قت التصوير و المكان في حاجة اتغيرت كيف يجب ان اتصرف ؟ و دة شكل من اشكال خبرة ال location

    انا اسف علي التطويل بس شريف يستحق و اكيد انتم معايا

    محمد العسكري
  11. Blogger barody posted at 7:06 AM  
    الف شكر يا باشا على التعليق على الفلم الرائع .. أنا بالصراحة شوفته قبل أشوف تعليقك .. لكن نظراً لغشامتي بالسينما ما لاحظت هذا التكنيك اللي ببتكلموا عنه .
    الأخوان ماشاء دراسين سينما ؟! رائعون
    بس هذا التكنيك دخل مزاجي من أوسع شريان .. الف شكر لك لأنك عرفتنا عليه .
    ومع البحث لقيت موسوعة الويكي بتتكلم عنه هذا التكنيك و هذه الوصلة
    http://en.wikipedia.org/wiki/Long_take
    ...بالنسبة للخوة اللي بيقارنوا بين فلم هند صبري و هذا الفلم .. لاوجه للمقارنة بين تصوير وصلة واحدة عادية و أخرى أكشن
    ((( مسوي فاهم في الإخراج)) هههههه
    تحياتي

Post a Comment

« Home