Monday, November 12, 2007

أحسن أسواء فيلم

جربت تتفرج على فيلم وحش جدا لدرجة انه حلو ؟! :)

كام مرة قعدت قدام فيلم سئ تتابع بمنتهى السعادة ؟!... للافلام السيئة سحر ما , يمكن لانك بتستغرب ازاى فى ناس ممكن تعمل كوارث و اخطاء مضحكة كدة و ضميرها مرتاح جدا لان ده فيلم سينما يا جماعة... و يالا يا ناس تعالوا اتفرجوا

ايد وود Ed Wood مثلا هو واحد من اهم الاسماء فى عالم السينما على مر التاريخ , لن تجد اجماع عالمى من النقاد و الجمهور على مركز هذا المخرج فى قوائم ترتيب المخرجين فى العالم ابدا , فهو و بجدارة يحتل المركز الاخير و يلقب بأسواء مخرج فى العالم , حتى ان ثلاثة من افلامة حصدت مراكز مرموقة فى قائمة اسواء 50 فيلم فى التاريخ ... شخصية مثيرة للاهتمام فعلا (ازاى الراجل ده قدر يعمل كم السفه ده !!!) ...
حتى ان هوليوود ذاتها اهتمت بصنع يديها و انتجت فيلم ED WOOD بطولة Johnny Depp

جرب تتفرج على جزء من رائعتة السينمائية Plan 9 from Outer Space ... الفيلم حلو فعلا :) التمثيل مسخرة و غطيان حلل على انها اطباق طائرة و اخطبوط كهربائى بايظ و حاجة فل على الاخر

أما troll ذلك الكائن المزعج كريه الشكل يحتل المركز ال 48 فى نفس القائمة بفيلمة الذى يحمل نفس الاسم ... و الكوميدى فعلا فى الفيلم ده ان صناع الفيلم متعلموش من الغلطة او المصيبة اللى عملوها ...بل و عملوا جزئين كمان من الفيلم ليتحفوا العالم بكم اكبر من العبط فى ثلاثية يخلدها التاريخ troll , troll2 , troll3
شاهد هذة الاجزاء من التحفة الفنية troll2 , لاحظ مستوى التمثيل ... لتكتمل لديك الصورة



هذا الجزء(troll 2) بالذات يعتبره البعض (احسن اسواء فيلم) فى العالم ...حتى انهم قرروا اعادة عرضة فى السينمات و عمل فيلم تسجيلى عن الفيلم و ابطالة و صناعة و اعادة لم شمل فريق العمل مرة اخرى ليحكوا عن الفيلم و ذكرياتهم عنه
شئ مثير فعلا .. أحسن اسواء فيلم !! ... و بالفعل ... اقبال جماهيرى عظيم .. ناس منبهرين بالفيلم لدرجة انهم يصرخون امام دور العرض (ده اعظم فيلم فى العالم ) :)
هنــــا موقع معجبين الفيلم ( الكلام بجد يا جماعة .. اعجاب فعلا ) .... و شاهد هنا جزء من الفيلم التسجيلى عن الفيلم





شكرا لجار القمر على نسخة فيلم ed wood و معلوماتة عن المخرج ed wood ذاتة


Labels: , ,

Posted by S H E B A K at 2:58 PM



13 Comments

  1. Blogger حـدوتـة posted at 7:36 PM  
    حلوة حكاية أحسن أسوأ فيلم دي...في أفلام اليومين دول أنا أدي الجايزة دي لفيلم "الشياطين" بمنتهى الجدارة...وأديه جايزة أحسن فيلم كوميدي في السنة اللي فاتت كمان :)
  2. Blogger ola salem posted at 11:38 AM  
    ثوانى ثوانى .. دى بيفكرنى جدا بأفلام الرعب الايطاليه فى السبعينيات لما كانت الموسيقى التصويرية هى اللى بتخوفك وتلاقى واحده ت تبص من الشباك قام واحد طاعنها وشاددها بره تقوم نقط الدم تقع نقطه نقطه بمنتهى الملل والخوف بردو طبعا لو مشغل السماعات ومعليها!!! الافلام دى كانت بتخوفنى جدا !!
  3. Anonymous Anonymous posted at 10:50 AM  
    أولا انا عايز اهنيك على المدونة الجامدة دى و أنا برضة بأحب الافلام الاجنبية و بأعتبرها تسليتى الوحيدة

    الفيلم اللى عن قصة ED Woodبالنسبة ل
    حياتة من أخراج تيم بيرتون و هو بيعتبر وود قدوتة فى حاجة هى ان وود كان بيحب صناعة السينما بدرجة كبيرة و كان عايز يعمل افلام بالرغم من قلة موهبتة او بمعنى اصح انعدامها,و طبعا ضعف الميزانيات و لكنة كان بيبذل كل جهدة عشان يخلى ممثلين معروفين يمثلوا فى افلامة و دة اللى كان بيرتون بيحاول يوصلوا فى الفيلم

    (B-Movies)و الافلام السكة دى
    كانت هى المدرسة اللى اتعلم فيها الكثير من المخرجين زى بيرتون اللى Mars Attacksعمل فيلم
    و اللى صرف علية ميزانية كبيرة عشان يطلعة بصورة زى صورة افلام الدرجة التانية و شارك فية مجموعة كبيرة من الممثلين الكبار زى جاك نيكلسون و بيرس بروسنان و كمان
    Quentin Tarantino و
    Robert Rodriguez
    Grindhouse عملوا فيلم
    و حاولوا يوصلوا فية لنفس النتيجة

    الفكرة ان المخرجين دول بيحبوا السينما و بيقدروا اللى سبقوهم بس كان ينقصهم الفلوس او الموهبة و لكنهم استفادوا منهم و من اخطائهم

    و طبعا أغلب الافلام العربى درجة تانية لانها بتتعمل سبوبة زى افلام المقاولات بس على انضف شوية
  4. Anonymous Anonymous posted at 9:13 PM  
    أحسن أسوأ فيلم عندي
    an american werewofl in paris

    عشان المشهد بتاع محاولة الانتحار من برج ايفل، مشهد عبقري في وحاشته و عبثيته، كأنه تهريج على هوليود

    يليه فيلم أبو الليل للمليجي، و خصوصا الكلب الجربان اللي ماشي معاه.

    و يلهم الفيلم بتاع أميتاب باتشان لما اصطاد الطيارة و هو راكب حصان زي الكاوبوي (حد فاكر اسم الفيلم ده؟)
  5. Blogger السينيور posted at 5:21 PM  
    طيب وفين الافلام العربي اللي فعلا كتير منها تستاهل لقب احسن اسوأ فيلم

    بس على فكرة ..انا اول مرة اشوف فيلم رعب كوميدي بالشكل ده
  6. Blogger قلم جاف posted at 10:34 PM  
    لدينا هنا في مصر إيد وود.. هو المخرج المصري إبراهيم عفيفي..

    عفيفي بشكل عام منذ أفلامه الأولى "القرش" و "القومندان" ونهاية بـ"الغجر" و "أبناء الشيطان" من النوع الذي تتحول الأفلام في يده إلى شيء آخر.. يمسك الكوميدي يحوله لتهريج سخيف "الكومندان" ، والأكشن يقلبه فارس كوميدي "أبناء الشيطان" .. ودة فيلم يوقع من الضحك من شدة سذاجته..

    يشترك عفيفي مع يوسف شاهين إن كل واحد فيهم بدأ تجاري علشان يتعرف ، القرش و الفرن بالتحديد اللي همة تقريباً أول فيلمين عملهم كانوا كدة ، وبدأت نظرياته الإخراجية تظهر في "الكومندان" وما بعدها..

    أنا شخصياً بأفكر أكتب عن المخرج النابغة دة..
  7. Blogger Mai Kamel posted at 1:14 AM  
    مش ممكن.. مدونتك واحدة من احلى المدونات اللى بزورها
    بجد فظيعة تحفة تحفة تحفة ماشاء الله
    وكاتب في البروفايل انك مبتعرفش تكتب؟؟
    :S:S:S:S:S

    اما بالنسبة للبوست فبعيدا عن كوني بخاف جدا من افلام الرعب بس عموما الواحد ساعات بتيجي عليه موود انه بيبقى عايز يتفرج على الافلام الهبلة دي.. هبلة بس مش هبلة وبتخوف
  8. Blogger Me, myself, and her posted at 8:33 PM  
    يا صاحب الشباك .. مدونة رائعة

    انا بلوجر على قد الحال واهي ماشية والحمد لله

    كنت عايزة منك وكمان من اللي ممكن يقروا تعليقي ده

    يا جماعة انا حموت عشان اعرف اعمل الحاجاتين دول:

    احط ( embed ) لليوتيوب في البلوج تبعي مش عارفة ، مافي اوبشن خاص بكدة

    وكمان

    عايزة احمل اغاني تتحط لينكات في الصفحة الرئيسية كمان مش عارفة ..

    مبدئيا دي كل طموحاتي لتطوير البلوج تبعي خاصة اني عندي ياما اشياء حابة اضيفها سواء افلام او كليبات صوتية

    ينوبكوا في ثواااااااااااااااااب قولولي

    تحياتي
  9. Anonymous Anonymous posted at 2:07 AM  
    ياه أنا جيت متأخر أوي ...عموماً أنا بأعشق الفيلم ده . طموح "إد وود" إنه يبقى زي أورسون ويلز من أجمل تفاصيل الفيلم ...على فكرة برضه أنا شفت "الخطة 9 " هو صحيح وحش لدرجة ممتعة بس لا يقارن ب " ترول 2 " و غيره ...أحد أحلامي دايماً إني أعمل فيلم وثائقي دفاعاُ عن "إد وود" و أعرضه في العالم كله...أكيد ما حدش في أمريكا شاف لولاكي ،فتحية و المرسيدس ،بهاريز،لعبة الأيام ،الشجعان ،الرجل الذي عطس و القائمة لا تنتهي إحنا بجد عندنا كنز :)
    و أنا متأكد إن سمير غانم و سعيد صالح هييجوا يشهدوا شهادة حق :)
    تعليقاً على كلام علا سالم هي تقصد فيلم داريو أرجينتو "ساسبيريا" وده على فكرة بيعتبروه من أعظم أفلام الرعب في التاريخ و لسه مختارينه في قائمة أحسن 100 فيلم غير ناطق بالإنجليزية اللي كتب عنها محمد خان مع إنه برضه بيعتبر "بي موفي" .
  10. Blogger عين فى الجنة posted at 2:40 PM  
    ايها العبقرى
    بص انت فلته من فلتات الزمان يندر ان يكون فى واحد فنان زيك هذه الايام
    انا اشد على يدك واحييك
    بس ما تطلعش فيها قوى يعنى:)) واكتب براحتك عشان تعرف تبدع
  11. Blogger عين فى الجنة posted at 2:41 PM  
    انت اسمك ايه يامحسن؟
  12. Blogger Another posted at 2:50 AM  
    الغباء في حد ذاته عبقرية وموهبة، كما هو الابتذال والسفه والسطحية ... لذا أعتبر (جوني ديب) ممثلاً عبقريًا في فيلم "إد وود" لنجاحه الشديد في فهم مفاتيح شخصية هذا المخرج السفيه\ العبقري وتقديمها بتلك الصورة الساحرة، ول(تيم بيرتون) أيضًا كل احترام على تنفيذه وإبداعه للفيلم بتلك الصورة الجميلة

    لم أشاهد "ترول"، ولم أكمل "الخطة التاسعة" ل(وود) لظروف تتعلق بنفاذ الصبر أكثر من ضيق الوقت؛ لكني أدعي فهم ما تتحدث عنه هنا ... ولأن الغباء والسطحية لهم جرأة خاصة وبالتالي عبقرية، فهو بديهي في رأيي اختيار أفضل\اسوأ فيلم، بعيدًا عن أفلامنا العربية في مجموعها لأسباب تتعلق بالإحباط وأننا نملك الكثير منه بالفعل والمشرحة لا تنقص قتلى زائدين

    تحياتي على المدونة الجميلة التي أتابعها بانتظام منذ زمن بلا تعليقات، واستئذان بإضافتها في قائمة التفضيل في مدونتي الكسيحة التي أطمع بزيارتك لها وإبداء رأيك


    :)
  13. Blogger أشرف حمدي posted at 3:28 PM  
    موضوع متميز جدااااا
    انا برضه شفت فيلم
    Ed wood
    تحفة :)
    وشفت لقطات الفيلم الفاشل المسخرة ده :) هههههههه طب والله حلو

Post a Comment

« Home