Wednesday, April 19, 2006

The Royal Tenenbaums

.

فى افلام كدة ممكن الواحد يتفرج عليها كذا مرة و يرجعلها تانى


The Royal Tenenbaums
هو واحد من الافلام دى , خصوصا لو كنت من الناس اللى بتحاول تتعلم سينما بجد , الفيلم مدرسة فى السيناريو و التصوير و التمثيل
طيب .. انا هحاول افصص الفيلم من غير ما احرق الاحداث و هأستعين بأسلوب اللقطات بتاعت مجنون السيما
سولو


الفيلم بيتكلم عن عيلة Tenenbaums و المحيطين بيها .. فى كم شخصيات فى الفيلم ده مش قليلة .. بس بعد عشر دقائق من الفيلم ها تتكتشف انك عارفهم كلهم بكل تفاصيل حياتهم و عاداتهم و ده انا بعتبرة صياعة سيناريست .. لان اى حد ممكن يحط حدوتة و يعملها فيلم لكن عشان ترسم الشخصيات كويس جدا بشكل يخلى المشاهد بقى عارفهم شخصيا و بعدين تحطهم فى قصة ..دى صياعة و قلة ادب

شوف الكادرات اللى فاتت لوحدها حكت تفاصيل قد ايه عن ابطال الفيلم

Wes Anderson هو مخرج و كاتب الفيلم

و مشاركه فى الكتابة Owen Wilson و هو احد ابطال الفيلم ايضا


يمكن تكون الحدوتة قصيرة فى الواقع يعنى لو هو فيلم عادى كانوا عملوه فيلم روائى قصير مثلا .. لكن الفيلم مليان تعريف بالشخصيات و رجوع لماضيهم فى حتت .. لكن مع كده مستحيل تمل و انت بتتفرج

دى مثلا لقطات لMargot اللى بتقوم بدورها Gwyneth Paltrow


المخرج ليه سكه فى الاخراج كده هو متميز بيها جدا .. تلاقى كادراته موزونه جدا يمكن بشكل مرضى شوية .. الشخص فى نص الكادر و الجنب اليمين فى نفس ثقل الجنب الشمال .. حاجة مسرحية جدا .. بس ده محققله موود افلامة اللى بتلاقى فيها التقطيع هادى جدا و الكادر موزون و الممثل هادى جدا فى اداءة و ده بيخلييك اكنك ببتصفح كتاب حواديت و ده بظبط الاحساس اللى هو اكدة فى الفيلم ده بذات لما عمل فواصل كالتى فى بداية فصول الروايات

.أسلوب المخرج فى جعل الابطال فى وضع symmetric ( متناسق ) فى الكادر بيعمل عندك حالة من التصديق للشخصيات دى و بتوصلك مشاعرهم خصوصا مع ثبات الكاميرا تماما ... و ده بيشد العين ناحية الشخص تماما و بيدى فرصة للمشاهد انه يتلقى كل المعلومات اللى هو مالى بيها الكادر


اللقطات التاليه عرض ثلاث شخصيات ثانوية تماما داخل الاحداث بشكل ثلاث لقطات مده كل واحدة ثلاث اربع ثوانى مثلا

شوف كده قد ايه اترسمت الشخصيات دى بمهارة و عرفت عنها كل اللى محتاج تعرفة فى ثوانى


حتى الاشياء المادية بتاخد اهميتها و دورها فى احداث الفيلم

وطبعا معالجة الاضاءة و الديكور و اختيار الكادرات حاجة متوحشة و هنا هاستعير تعبير العزيز جمالون : اى حتة تعمل فيها ستوب تلاقى بوستر

ايضا اسلوب المخرج العبقرى لم يتغير مع تسارع الاحداث و دخولها فى مرحلة الاثارة .. يستمر فى كادراته الثابتة الهادئة الموزونة

و طبعا بجانب كل ده الاداء العبقرى لابطال الفيلم


Posted by S H E B A K at 2:41 PM



8 Comments

  1. Blogger Mist posted at 12:35 PM  
    استمتعت جدًا جدًا وأنا بأقرأ البوست ده
    سيبك من الصفحة كانت بتحمّل على نغمة "اتخمطري ياحلوة يازينة"بس بجد تحفة
    أول مرة أشوف أساسًا حتى كادراته بالمللي كده..والممثل في وشط خبط لزق كده..في النص بالضبط

    غير طريقة عرضك ،والبوستات اللي قبلها أساسًا
    هو انا بقالي فترة محترمة يمكن ماجيتش عندكم ..
    هانبقوا نيجوا على طول بقى
    :)
  2. Blogger ماشى الطريق posted at 12:56 PM  
    أيه يا عم الناس دى كلها ده كان ناقصهم حسن حسنى
    الفيلم عموماً شكله مشجع إن الواحد يشوفه
    و كادراتك دى مغطية الموقف جداً
  3. Blogger Guevara posted at 4:52 PM  
    جميل جدا ً، و اللي يعوز الفيلم ده يا ترى يلجأ للداون لوود ، ولا يسأل الغريب؟ و لا شباك حيطلع جود بوي و يجيب الفيلم لوحده كدة بالذوق؟
  4. Blogger Ghada posted at 9:54 AM  
    مقدرش طبعاً متفرجش على فيلم شباك باشا بيشيد بيه

    نزلته وشفته

    فيلم غريب شوية ومضحك شوية

    حبيت الشخصيات اللي في الفيلم أوي، أكتر واحدة عجبتني كانت جوينيث -كالعادة- وكاثلين كمان

    الحقيقة لما شفته اكتشفت إن انت بردو كمجنون سينما أو مونتيرن ليك نظرتك الخاصة في تحليل اللقطات غيري خالص

    زي مانت قلت فعلاً، إن جمال اللقطات كأنها لوحات، والاهتمام بالتفاصيل، هي أحلى ما في الفيلم
  5. Blogger anosh posted at 6:11 PM  
    انت فنان ودقة ملاحظتك ديه حتخليك حد جامد جداً في فنك وشكراً علي شان خلتني مستمتعه جداً بتعليقك
  6. Blogger Nasser posted at 3:25 PM  
    الفيلم ده من الأفلام اللي انا بحبها جدا لكن المرتين اللي شفته فيهم كنت بعد ما يخلص بسأل نفسي انا عجبني الفيلم ده أوي و عشت معاه 100 دقيقة و انا مستمتع كده ليه مش بلاقي سبب واضح
    البوست بتاعك بقي خلاني شفت الحاجات الجميلة في الفيلم اللي انا بحبه
    يعني يمكن دي أول مرة حد يقولي - انا - بحب حاجة معينة ليه
  7. Blogger S H E B A K posted at 4:03 PM  
    Mist
    ماقدرتش امنع نفسى من انى احط كل الصور دى .. بصراحة الفيلم مشجع
    تشرفى يا فندم و نسقوكى شاى كمان
    :-)

    Guevara
    هو حسن حسنى كان مرشح فعلا لدور بس جابو الراجل الهندى مكانه
    لازم تشوفة يا ريس

    gahda
    شوفته ؟ ..ز عبقرى مش كده

    anosh
    :-)

    nasser
    كفاية انه عجبك ... كده انت متزوق
  8. Blogger tona posted at 5:47 PM  
    بصراحة واضح جدا ان الفيلم تحفة , وفعلا الكادرات مظبوطة بشكل مبهر وبيظهر فيها وجة نظر المخرج بشكل عبقري
    انت فعلا تحفة ، وسردك السريع لاحداث الفيلم مع تحليل عناصرة بيظهر اد اية انت حد فاهم

Post a Comment

« Home