Sunday, October 02, 2005

الفيلم تانى

مش عارف ايه المشكله فى المكان اللى عملت أبلوود فيه.. بس من الواضح ان اللينك ماشتغلتش مع كل الناس
و تتطوع الشخص الظريف
محمد سمير صاحب الفوولاب العجيب
باستضافة الفيلم عندة لمده أسبوعين على
اللينك ده
ftp://foolab.org/pub/spending_20_min.wmv
شكرا يا فندم ..و احب أسمع رأيك فى الفيلم


من فضلكم اللى ينزل الفيلم يقولى رأيه .. عشان ده السبب انى حطيته اونلاين

Posted by S H E B A K at 9:59 AM



10 Comments

  1. Blogger Guevara posted at 2:11 PM  
    E3mel Word verification ya 3emad fee el comments 3ashan el 2araf dah maygeesh
  2. Blogger S H E B A K posted at 2:13 PM  
    7ader
  3. Anonymous Anonymous posted at 5:27 AM  
    ايه الحرفنة اللي ف المونتاج دي!!! ده أحلى حاجه في الفيلم، فهمت دلوقت يعني ايه انت مجنون مونتاج... حبة التقطيع اللي ف الأول دول حلوين بجد

    اختيار الأغاني لذيذ..... الأغاني مناسبة للمشاهد..
    عجبتني الأغنية اللي كانت شغالة في مشهد النسكافيه (المشهد ده كان لطيف على فكره)

    تاني (أو تالت؟) حاجه عجبتني ف الفيلم..... الولد الممثل اللي كان معاه كيس البقسماط..... بجد تمثيله حلو.... تلقائي أوي، ونطقه للألفاظ واضح

    الإخراج فيه ذوق عالي.. عجبني ان فيه عنصر بيربط بين كل مشهد والتاني بشكل من الأشكال، طريقة الترانزيشن دي حلوة

    السيناريو عامل زي ميكون مرتجل ... مفيهوش افتعال، رغم ان الفكره (فكرة المرحلة الانتقالية) ممكن تتعرض بطريقة أعقد من كده، لكن الحلو انكو عرضتوها بطريقة... من كتر بساطتها تكاد تختلط مع السطحية لكنها مش كده أبداً

    فكرة "المرحلة الانتقالية" عاجباني جداً... غريب ان جودة حياتنا أو كثافتها بتفرق بس بمجرد تغيير فكره، أو طريقة نظر للأشياء
    أنا جت لي فترة اعتبرت فيها الحياة مرحلة انتقالية و"بس"، يعني كل اللي المفروض أعمله اني أستنى الموت، وكانت من أسوأ مراحل حياتي...

    انتو طبعاً بإعلانكو من الأول ان الفيلم 20 دقيقة خلليتو الفيلم مرحلة انتقالية علشان العشرين دقيقة يخلصوا، خصوصاً ان رتمه بطيء جداً، مقدرش أقول ان فيه متعة.... غير ف الجزء بتاع النقاش بين الولدين

    على فكره وسائل المواصلات صحيح مراحل انتقالية، بس في السفر مثلاً بتبقى متعة "لذاتها"، الل
  4. Blogger Ghada posted at 6:07 AM  
    that anonymous is me, sorry :)
  5. Blogger AZ posted at 3:18 AM  
    الفيلم جامد جدااااااااااااااا
    بس ولنبى معلش فى سؤل على طرطوفة لسانى مش قادره مسألوش
    هو البقسماط كان سادة والا بسمسم؟؟؟؟؟؟؟؟؟؟؟؟؟
  6. Blogger S H E B A K posted at 5:26 PM  
    :غادة
    شكرا بجد يا غادة
    يمكن تكونى اكتر حد لقط الفكرة
    الواد ابو بقسماط ده هو
    وهو مشارك فى الفكرة و الموودdotted
    عشان كده جايب الموود صح مع انه مش ممثل
    فعلا لو بصيتى للدنيا على انها مرحله انتقاليه هتلاقى ملهاش اى معنى
    الريتم البطئ ده مقصود جدا عشان تاكيد المرحله الانتقاليه

    على فكره وسائل المواصلات صحيح مراحل انتقالية، بس في السفر مثلاً بتبقى متعة"
    مافيش حاجه فى حد ذاتها ممكن تتصنف مرحله انتقاليه او لا
    :-)

    AZ:
    البقسماط كان ساده يا فندم و كان بايت و ما كنش بيقرمش تماما
    الميزانيه محدوده شويه
    :-)
  7. Blogger Omar Mostafa posted at 11:01 AM  
    تسلم ايدك يا عماد، المونتاج فيه لمسات ذكية في أجزاء مختلفة من الفيلم..
    لكن أكتر من ملاحظة عندي:

    - فكرة التعبير عن (المرحلة الانتقالية)، وكونها مملة من عدمه، مش ضروري يكون بتسريب الملل نفسه للمشاهد عن قصد، وكون الفيلم نفسه مرحلة انتقالية فده يوجب على اللي بيعملوه إنهم (ينقلوا) الناس لشيء ما درامياً في النهاية، كتعويض عن كل الانتظار ده، لكن انا متنقلتش لحاجة.. يعني الإيقاع مكانش فيه تنويع وتوازن كافي على مستوى شريط الفيلم

    - كان ممكن الاعتماد على المزيكا أكتر في مناطق كتيرة من الفيلم، أو كان ممكن الاعتماد على المزيكا بس أصلاً، لإن الصوت بالفعل كان فيه مشاكل (شوشرة وعدم وضوح مغطية على الحوارات اللي هى مش بسيطة كمعاني)، المزيكا كان ممكن تعوض مساحة دراما كبيرة مفتقدة

    - عاجبني التنويع في زوايا التصوير المستخدمة، ولو إني باشوفه مكانش مناسب في بعض الأحيان، أو مبالغ فيه في أحيان تانية

    - ليه الكاميرا كانت مكسوفة من الناس والناس مكسوفة من الكاميرا؟!

    - يظل الكولاج اللي في بداية الفيلم موفق إلى حد كبير

    - تكرار المشهد الزمني من مكانين مختلفين (العربية والأوضة) فكرة ملعووووبة

    قشطة يا شباب.. عايزين تااااااااني
  8. Blogger Alaa Alragehy posted at 2:47 AM  
    بصراحة انا مابفهمش في السينما جامد

    بس انا عن نفسي الفيلم عجبني فيه حاجات كتير

    من اولها ان اللي فيه صحابي
    وانهم بيعملوا حاجة بيحبوها
    وبيحاولوا انهم يعملو حاجة كويسة

    ده غير اني عجبني طريقة التصوير والمونتاج والموسيقىاللي فيه مع انها مش نوع الموسيقى اللي بحبه

    في بس شوية حاجات في الاصوات المحيطة بالمكان مع انها طبيعية بس ماريحتنيش

    اللي مش عاجبني في الفيلم

    اني ماكنتش فييه :)

    والمرة الجاية انا راشق في الفيلم حتى لو هطلع في الكدر عافية

    فللل ياعمدة كل فيلم وانت طيب
  9. Anonymous Anonymous posted at 2:39 PM  
    فكرة بتاعت التليفون لما أتقسمت على ثلات كميرات كانت جامدة جدا واثبتت وجود عقول شباب بتفكر (اصل بصراحه كنت شايف انا وحدي اللي بفكر)
    اعتقد انك بتحب يوسف شاهين لأنوا من هواه التلاعب بالعنصر الزمني


    كان عندي سؤال عن مكان التصوير والشباب منين ؟
  10. Anonymous Anonymous posted at 12:01 PM  
    يا جماعة ارجوكم انا لسه جديد هنا ونفسي موت اشوف الفيلم ياريت حد يعملنا لينك جديد

Post a Comment

« Home