Monday, August 08, 2005

انت فتشة و مش سميع منير ...أخيييييى عليك

الظاهر ان البلوج بناعى هيتحول الى ساحة قتال مابينى و بين المعجبين حتى الجنون بألبوم
منير .. وصلتنى تعليقات شديدة اللهجه على موضوع
لا يامنير مش كل مرة
lobbod من الأستاذ
و الأخ محمد م فوزى
و أخرون لم يتركوا تعليق لكن قالوها لى فى وشى
هجوم شديد و تحول بشكل ما الى هجوم على شخصى بالذات فقررت ارد على الموقف
مع انى ما كنتش عايز أكتب لرابع مرة عن منير فى البلوج و اسف لكل اللى بيدخل البلوج بتاعى كل مرة يلاقى منير , لكن للضرورة أحكام

أولا أحب أسجل احترامى و حبى الشديييييييد لمحمد منير اللى بعتبره أحسن مطرب فى مصر فى العشرين سنه اللى
فاتوا , انا بسمع الراجل ده من أول ماطلعلى ودان تقريبا وبحب أغانيه اللى بحاول أجمعها كلها حتى الحاجات النادره , و بحب شكله و حركاته و ردوده فى اللقاءات و حتى الجمل اللى بيقولها مابين الأغانى فى حفلاته اللى كنت بحضرها و بردد مع مجانينه و مريديه : الكبير كبير يا محمد يا منير , صوته هو معنى الغنى و من كتر ما غنيت معاه بقيت بحس انى لو غنيت هيطلع من بقى صوته
من الاخر بعتبر نفسى من مجانين الراجل التحفة ده و متأكد انى أكيد بسمعة قبل كل اللى علقوا على الموضوع

ثانيا : انا برضه كنت من الناس اللى بيصنفوا البنى أدمين نوعين : سميعة منير و ناس مابتفهمش ... لغايه ما أكتشفت ان كل انواع موسيقى ليها احترامها و ان الشخص اللى بيسمع اغانى تافهة و ملهاش اى معنى برضه ليه احترامه عشان هو شايف فيها حاجه بتعجبه و هى دى روعة الموسيقى مقياسها الوحيد انها تخش قلبك .. شوف قلبك و دور على الموسيقى اللى مقاسه

ثالثا : بالنسبة للهجوم الشخصى انى فتشه... و ماستحقش أكون من سميعه منير ... و انى بعلق فشلى فى فهم الألبوم على شماعة لا يامنير ! ( مش فاهم يعنى ايه الجمله دى ) فانا مش هرد .. بس لو السادة سميعه منير اللى من جيل سوياسو خلعوا عنى لقب سميع منير ...ماعنديش مانع

رابعا والأهم : انا ماقلتش ان كل الألبوم كله وحش , بالعكس فيه اغانى باموت فيها , كل الحكايه انى قلت رأى فى الألبوم و ما نشرتش ده فى مجله مثلا أنا باقول ده فى البلوج بتاعى اللى المفروض انه بيعبر عن رايي
لكن و اكرر ان الألبوم مش مستوى منير و انه فى الفترة الأخيره بدأت اتجاهات السوق تؤثر على أختياراته ..
منير بدأ مشواره الفنى مع عمالقه مثل احمد منيب (اللى مش بيذكره فى اى لقاء مش فاهم ليه) و عبد الرحيم منصور و يحى خليل و رومان بونكا .. ناس فعلا كلهم فنانين و كان معاهم منير بصوته الصادق فطلعوا احلى أغانى فالدنيا و بعد كده اختفى منير لفتره و رجع مع جيل تانى عشان يثبت انه لسه قادر انه يعمل فن متميز باختياراته و مغامراته الفنه المحسوبه ولانه شخص بيحب يغنى اتجه انه يغنى كل ما يدق قلبه له و كل سميعة منير (اللى كنت منهم) خاضوا معاه كل المغامرات دى , كنت باشترى الألبوم واتفزع فى الأول و بعدين أحبه و اقتنع بالأبواب الجديده اللى دقها المغنى الفذ ده , عشان صوته بيدخل و يعشش فى دماغى
لكن المره دى لا .. اغانى زى ايدايا فى جيوبى و امبارح و بننجرح حلوين فعلا , لكن فى أغانى مش قادر أسمعها بجد , حاولت لفترة لكن أنتهيت انى بسمع الوش الأول فقط من الشريط , و ده اول مره يحصلى مع منير , بس مش قادر أسمع مثلا حيكاتوووووه حيييكايه و روايتوووووه رييوايه
اما بالنسبه ل اللى بيقول ان الألبوم لازم كلنا نسمعة عشان ده أحسن حاجة نزلت الموسم ده فلامؤاخذه بقى ده المفروض تشيلوه من رابطه محبى ألبوم أمبارح كان عمرى عشرين .. من امتى ألبوم منير كان بيرتبط بالموسم والمقارنه مع البومات السوق


فى النهايه و للمرة التلاتين بقول ان دى كانت وجه نظرى كشخص بيحب منير فى المغامرة الأخيرة بتاعته , و مش المفرض ان كل مرة يجرب حاجة جديدة تعجبنا , أحيانا ممكن نقوله : لا يامنير مش كل مرة
(ممكن برضوا تقروا ردود افعال ناس تانيه بتحب منير عند غادة و عمر (كاتبين عن الألبوم بشكل أحسن منى كتير

Posted by S H E B A K at 12:21 PM



13 Comments

  1. Blogger sydalany-وش مكرمش posted at 4:53 PM  
    على إيه كل ده

    يا راجل ماحدش واخد منها حاجة
  2. Blogger أحمد posted at 6:12 PM  
    هخاهاهاهاه
    هاهاها

    انا شخصيا بكرهه اثنين
    الكتاب الشبان
    و سميعة الكنج منير

    طبعا انا واحد من اللى طلع دينهم مع ناس كتير زى دول من سميعة الكنج اللى هما بيتنفسوا الكنج حتى النخاع

    لكن في الحقيقة ان النوعيات دى بتكون فارغة ، و بتتعامل مع منير و كأنه اله نزل لهم من السما .. مع انه مجرد مغنى لا أكثر

    نصيحة من اخوك بيسو
    طنش
  3. Blogger AZ posted at 9:44 PM  
    لا حول ولا قوه الا بالله مانت حر ياعم منير يعجبك والا تقول عليه ابن تربنتين كلب حد ليه حاجه عندك؟؟ هم يعنى سميعه منير ليهم بوابه محدده بيخشوا منها الجنه يوم القيامه؟ ياسيدى ماتقلقش الجنه ليها 7 ابواب تانيين غير بوابه محبى محمد منير.. ولعلمك سميعه منير هم اللى ماعجبهمش شريطه الاخرانى
  4. Blogger Ghada posted at 6:36 AM  
    أنا كمان لقيت ردود فعل شبه كده، بره البلوج حتى
    مشكلتهم انهم مش قادرين يصدقوا ان منير ده بني آدم، بيغلط وممكن يهيف
    ممكن أساساً(هو فعلاً كده) يكون ناسي الأغاني اللي غناها زمان دي واللي احنا بنحلف بيها ونسمعها ونعيط
    منير مهما كان مؤدي، الأغاني دي مش إبداعه لوحده، وعشان نقد الأغاني يبقى فيه زمة لازم الواحد يحط الحقيقة دي قدامه وميديش المؤدي حجم أكتر من كونه مؤدي

    اوعى يا عماد تتأثر بيهم وتغني حكايتووووو حكايه وروايتووووووو رواية
    لا، عقلك ف راسك تعرف خلاصك خللينا محتفظين بشوية الحس اللي عندنا
    ده أنا فيه ناس قالت لي ان معاني أمر الهوى أصعب من ان أنا أفهمها من كتر عمقها، وأنا لا يمكن أستحمل أسمع الأغنيه دي ثانيتين أصلاً. قال أمر الهوى قال
  5. Blogger AZ posted at 12:18 AM  
    ايه ده ايه ده!!!!!! انا قريت دلوقتى رد الاتنين عليك فى البوست بتاع مش كده يا منير وبجد عيب عليك اوى يا عماد ترد على الناس دى اساسا لان بمنتهى البساطه الناس دول مايتردش عليهم غير بطريقتهم واعتقد ان لانا ولا انت ولا اى حد بيحترم نفسه هيستخدم طريقتهم فى الرد لان عمرنا ماهنوصل فى الحوار لدرجه انا بسمع منير من ايام اما كنت انت بتسمع كوكو واوا وبحط الوكمان فى ودانى من ايام اما كنت بتحط مشعارف ايه فين لو الناس دى هم السميعه بتاعه منير يبقى يا خساره عمرى الضياع فى سماع منير.. انا اؤيد واحد فيهم لما قال ياريت سميعه منير فضلوا قليلين.. واسمحولى انسحب من وصله الردح المباشر دى
  6. Blogger S H E B A K posted at 5:06 PM  
    انا مش متضايق كل الحكايه انى حبيت أرد على الناس اللى افتكروا انهم أفحمونى بتعليقاتهم و انى المفروض ارجع لعقلى بقى
    انا كمان با ابليس بكره اوى فئه المثقفين الشبان اللى بقعدوا فى المجتمعات المثقفه بقى و يفتكروا نفسهم من الصفوة
    و دلوقتى بقى سميعة الكنج دول كمان بقوا مخهم تخين موت
    غادة : مش هاسمع انا ابدا حكايتوه حكايه .. دى بشلنى
    نفسى : طبعا هنسمع شباك ... قصدى شبابيك
    أى زى : شفتى بقى ياستى المستوى و صل لايه؟ .. بس ربنا يخليكى يا نصفانى
  7. Blogger AZ posted at 8:57 PM  
    بس برده هملص ودانك عشان اللى عملته فى مويتى هذه نقره وتلك نقره اخرى ودنك ودنك ودنككككككككك
  8. Blogger Hany Mihanny posted at 4:59 PM  
    بقيت مشاغب يا عماد
    لسه حالا مخلصين اجتماع وقررنا اننا نخطفك ونحبسك في أودة انت والشريط
    ومش هتخرج منها الا لما تشغله بأيدك وتسمع اغانيه كلها ..لا وكمان تكتب اللي أستفدته من كل اغنيه
    .........
    هههههههههههه
  9. Anonymous Anonymous posted at 5:49 PM  
    Leadership PACS Use Varied Strategies
    Got a scoop? Email your tips and suggestions to the editor. Premium Blog Ad Blog Ads Classifieds Amazon About The Site Taegan D. Goddard is the creator of Political Wire, a political column updated around the ...
    -Josh the Cat guy

    If you like cat gyms
    I have a cat gyms site.
  10. Blogger Alaa Alragehy posted at 5:51 AM  
    عجبني كلامك ياعماد بالنسبة للشريط الاخير بتاع منير
    اللي بصراحة مايستحقش ينكتب على الكفر بتاعه محمد منير كان ممكن محمد فؤاد تمشي احسن
    انا عن نفسي مش فاهم ايه اللي عمله منير بالظبط وايه اللي في دماغه بالظبط
    وماعرفش هو عايز يعمل جمهور جديد او عايز يعمل شخصية جديدة لمنير
    انا عن نفسي يوم مالشريط كان نازل كنت مطبق لغاية الصبح عشان انزل اجيبه ولما سمعت اول اغنية اتخضيت قمت ماسك الكفر عشان اتاكد تن الراجل مادنيش شريط لمحمد فؤاد
    الشريط مافهوش حاجة تعلم مع الناس ولا فيه اغنية كاملة من مجاميعه كلمات والحان وتوزيع ممكن تطلعلك بكلمة او سولو او فكرة صغيرة من كل اغنية لكن غير كدة ماتلاقيش ده غير ان مافيش حاجة تقدر تقول ان ده منير
    ده غير ان الشريط ماحدش حس بيه ولا اتعمله دعاية عدلة
    اللي غايظني من الموضوع ان هو فقد التميز ولو جبت اي كلب هيغني كل اغاني الشريط وهيبقى عادي
    غير كدة ان هو قاعد سنتين بيخترع في ايه انا شايف ان الحوار الي طلع ده اخرو شغل اسبوعين مش سنتين

    عامة هو من يوم ما البتت حضنته في حفلة الكونتري كلوب وهو متغير

    على فكرة يا عمدة احنا معرفة من الحقيقة بأمارة الاستوديو
  11. Blogger Aladdin posted at 8:48 PM  
    الشعب الذي يتقبل (موسيقياً) أن يتحول لاعب اسكواش صايع إلى مغنى لا لشيء سوى أنه (وحده) قرر ذلك شعب لا يستحق أن يسمع "مزيكا نضيفة". هذا أولا. ثانيا، كم حركات "الأليتة" في الوسط الموسيقي يجعل من متوسطي المستوى يلمعون (إعلاميا) بينما تتوارى المواهب الحقيقية وتدفن في التراب!

    تذكر فيلم "الكيف" واعلم أننا أصبحنا "مدمنين" موسيقى هابطة أيضا - إلى جانب الحشيش والبانجو!!
  12. Blogger S H E B A K posted at 11:26 AM  
    Y.mejahd:
    لا بلاش أرجوكوا بلاش مع الشريط فى اوده وحدة .. خلوها اوضه الفران أحسن
    Az & nefsy :
    اى اى.. ودنى ودنى
    (كده ...طييييب (نظرة تحدى لأى زى
    ماشى .. ويجرى بسرعة و ياخد عروسة نفسى و يرميها من الشباك
    (هاهاها (ضحكة شريرة
    Foxology:
    الأستوديو!! .. ده انت طلعت معرفة بقى .تشرفنا يا فندم... كتم بقى على الموضوع ده و أشوفك فى الواقع
    aladdin:
    فعلا مدمنيين موسيقى هابطة , أول ما طلعت قنوات الموسيقى قلت تمام كده بقى فى فرصه لكل اللى عنده موهبه و أفكار جديدة فى الموسيقى ممكن يطلعها و ننفتح شويه على أنواع تانيه من الموسيقى و الأغانى اللى محرومين منها لكن للأسف الموضوع عمال يزداد سوء و مسكوا فى الهايفه و أدمنوها و اعتبروها هى الفن
  13. Blogger Omar Mostafa posted at 11:27 AM  
    عادي يا عمدة، زى ما نصحك إبليس: طنش، لإن كله محصل بعضه، وكله على كله، واما تشوفه.. قولّه

Post a Comment

« Home