Monday, July 18, 2005

لا... يا منير

طيب... الألبوم نزل

بعد جلسة أستماع مع مجموعة من الأصدقاء وقراءة كلمات الأغانى و محاولات الأستماع الفرديه للألبوم لمدة أسبوع تقريبا ممكن أقول أن الألبوم مش مستوى منير ...مش هوه دة منير اللى بسمعه من 20 سنة من 11 أغنيه هما4 أغانى اللى يتسمعوا... ممكن أتكلم عن أغنية أغنية من ال11 (يمتنع عن قراءة التالى كل من يرى الألبوم تحفه و هو عصارة (خبرة محمد منير

أمبارح كان عمرى عشرين : هى أغنية ممتازه لحميد بارودى أو التراث الجزائرى , التوزيع جيد و منير يغنيها بشكل جيد , لكن فى تغييرغريب فى الكلام مش عارف دى غلطه ولا ايه :أمبارح و أنا بغذوبتى فارح , فى الشوق و الهوى سارح هكذا كتبت الكلمات فى غلاف الألبوم لكن فى الأغنيه يقول منير : امبارح وانا بغذوبتى سارح فى الشوق و الهوى سارح , و رغم انها أسوأ شعريا لكنى أتمنى ان تكون مقصودة

اامبارح...كان عمرى عشرينكلمات : محبوب باتى - لحن : محبوب باتى - توزيع :حميد بارودى

قلب فاضى- أمر الهوى : كلمات مش بطاله , توزيع عادى

قلب فاضى كلمات : بهاء الدين محمد - لحن : حسن أبو السعود - توزيع : محمد مصطفى

أمر الهوى كلمات : كوثر مصطفى - لحن : زياد الطويل - توزيع : أشرف عبده

صياد : أغنية قديمة لمغنى يدعى محمد طه , أختيار غريب جدا لمنير و اسلوب فى الغناء بعيد تماما عن أسلوب محمد منير , و أعتقد انه غناها عشان يؤكد فكرة تقبله لكل الثقافات و أساليب الغناء المختلفة ,ممكن نتقبل ده لكن فكرة و ضعها مرة أخرى فى الألبوم بتوزيع لم يضيف اى شئ بالمرة... مش حلوه, عانيت جدا عشان أقدر أسمع هذة الأغنيه لأخرها و هذا لم يحدث معى فى اى أغنية لمنير من قبل

صياد كلمات : محمد طه - لحن محمد طه - توزيع : حميد بارودى

صوتك : هذة الأغنيه .. منير فعلا , لكنها نسخة بهتانه من لما النسيم

صوتك كلمات : عبد المنعم طه - لحن : أشرف سالم - توزيع : محمد مصطفى

ويللى : دى أغنيه أفراح يا جماعة

ويلى كلمات : عيسى عباس - لحن : أشرف سالم - توزيع : أنور عمرو

حاضر يازهر : كلمات جيدة للشاعر الغنائى عبد الرحيم منصور , لحن عادى و توزيع سخيف للأخ أشرف عبدة الذى كان حضورة طاغى على الألبوم

حاضر يازهركلمات : عبد الرحيم منصور - لحن : هانى شنوده - توزيع : أشرف عبده

حكايته حكايه : لا تعليق ...ماليش نفس

حكايته حكايه كلمات : حسن عوض ابو العلا - لحن : أحمد المستشار- توزيع : رومان بونكا

أيدايا فى جيوبى : دى بقى أغنيه حلوه فعلا , رباعية جيدة لصلاح جاهين و لحن متميز لوجيه عزيز و توزيع ممتاز لرومان بونكا .. كان ممكن تنزل فى ألبوم لوحدها و هاكون مبسوط يبه


ببنجرح : أغنيه جيدة أيضا و توزيع ممتاز ... سمعت انها متسجله

Unplugged
, منير مع اربع عازفين فى الأستوديو و دى حاجة ظريفة

بننجرح كلمات : محمود رضوان - لحن : نبيل جودة - توزيع : رومان بونكا



أكثر من مرة حصلت ان منير ينزل البوم و يكون أقل من اللى قبله و بعد فترة أتعود عليه لأنه فى الأخر بصوت منير اللى بيدخل جواك و ماتقدرش ماتحبوش

:لكن بعد هذا الألبوم و مع ان بعض أغانيه جيدة

لا يامنير ... مش كل مرة

Posted by S H E B A K at 12:01 PM



19 Comments

  1. Blogger حـدوتـة posted at 2:53 PM  
    أنا محبطة أوي من الألبوم :((

    أنا متفقة معاك في أغلب تعليقاتك على الأغاني وإن كنت شايفه إن "أمر الهوى" كانت ممكن تكون أحلى بكتييييير لو التوزيع مختلف

    الرباعية وجيه بيغنيها جميلة جداً (في حفلة لوجيه في الساقية يوم الأحد 24 يوليو) ومش شايفة ليه يعني منير اخد سنتين عشان في الآخر يعمل شريط نصه أغاني ناس تانية ومش بيضيف فيه حاجة

    خسارة يا منير
  2. Blogger Nefsy posted at 3:28 PM  
    أنا معاك فى الكلام ده
    اول مرة أسمع منير ومحسش زى كل مرة
    يمكن بس أغنية قلب فاضى كانت على الجرح فهى بس اللى حسيت بيها
    الكلام ده اتقالى من واحد بقاله برده كتير اوى مع منير قالى ده مش أحساس منير كان يقول الكلمة تحسها بس المرة ده لأ ... يمكن متعودتش اقول على منير كده فأى حد يسألنى هن الابوم أسكت .. مينفعش اقول غير الالبوم تحفه .. بسالمرة دى السكوت أفضل
  3. Blogger AZ posted at 10:07 PM  
    حتى قلب فاضى فكرتنى بأغنيه له " مين ياخد قلبى المليان ويدينى قلبى الفاضى " نفس المعنى بس تدىها على عينها بالجزمه... انا ماقدرتش اسمع الالبوم كله ماليش نفس لغايه دلوقتى...
  4. Anonymous ghada posted at 5:01 AM  
    انت بتفهم.... وانت فعلاً منيري يجد
    الماسايه الوحيده ف الألبوم هي ايديا ف جيوبي
    بقى له كام ألبوم يكتفي بماسايه ف وسط ازاز... حاجه خساره
  5. Blogger Lasto-adri *Blue* posted at 7:13 PM  
    روح عندنا يا عماد.. وقول رأيك


    http://pianolla.blogspot.com
  6. Blogger Zeryab posted at 4:24 AM  
    هى المشكلة بس إنه ما عدش بيغنى من قلبه بس انا مش بلومه يعنى إيه اللى لسه بيطلع من القلب صافى وحقيقى
  7. Blogger ساحر الصحراء posted at 4:47 AM  
    اتفق معك منير ليس هو منير الاغنيتين الوحيدتين اللى لمسونى هم بننجرح وايدياوبالفعل انا زعلان من منير جدا
  8. Anonymous Anonymous posted at 1:51 PM  
    الألبوم عالي جداً
    و انا مختلف تماماً مع الجماعة اللي بيقولوا ان الأبوم وحش
    اسمعوا كتير و عيش معاه و انته هتحس بيه اوي
    ايديا في جيوبي (عاليه جداً و دماااااااااااااااااااااااااغ عالي اوي )
    بننجرح ( شغاله و تنفع اللي محبطين عاطفياً )
    امبارح ( جميله )
    قلب فاضي ( بهاء ساعات بيبقى مالوش حل )+ منير في الأغنية دي دمااااااغ
    صوتك ( لو مزنزق في كلمتين عواطف يخشوا ع القلب صاروخ هو منير و بس )
    أمر الهوى اسمعها و ادعيلي
    صياد ( محمد طه و منير بيلعب في حتت كنا بنقول مش بتاعته لأ بتاعته و تسمعها منه غير من محمد طه التوزيع عامل مع أسلوب منير أغنية جديدة و منير بيصر على الإعادة بس إعادات منير بعث جديد و مختلف مع حبي للأصل )
    حاضر يا زهر (دي الأيدينتفيكاشن و التيمة بتاعت منير )كلمات سهله و بسيطه بس وراها بحر و دنيا من الإحساس يطلع بايه غير صوت منير

    حكايته حكايه و ويلي أأقل أغنيتين في الشريط
    بس حكايته حكاية منير عاد التيمة دي كتير
    و ويلي سهله و انا مش مستنيها من منير و مفيهومشي الاتنين جديد
    بس القليل عند منير أحسن ما في الموسم كله
    ده منير
    منير عارفين يعني ايه منير
    و اسف ان طولت
    محمد فوزي
    mohammed.m.fawzy@gmail.com
    mohammed_m_fawzy_m@hotmail.com
  9. Anonymous Anonymous posted at 2:05 PM  
    أنا آسف هكتب تاني
    المرة اللي فاتت انا اتكلمت عن الأبوم عو من وجهة نظري الشخصية
    المرة دي هحلله بعيد عن العواطف
    يصعب أن نطلق حكماً نهائياً على تجربة محمد منير في ألبومه الجديد «امبارح كان عمري عشرين» الذي صدر قبل أيام عن شركة «ميراج». سبب الصعوبة يعود أساساً إلى المكانة الخاصة التي يحتلها منير كمطرب بين مطربي الثمانينات وهي مكانة نجح صاحبها في الحفاظ عليها، على رغم العواصف والتقلبات التي مرت بها سوق الغناء. لكنه ظل وحده في المنطقة الدافئة والآمنة تجارياً وفنياً أيضاً طوال رحلة عمل يزيد عمرها على ربع قرن نجح خلالها في ارتياد آفاق جديدة لم تطرقها الأغنية المصرية من قبل وراهن مع من تعامل معهم على تغيير الذائقة التقليدية.

    على مستوى الأداء الموسيقي، بدا واضحاً أن البيئة النوبية التي جاء منها منير منحته ضمانة التميز الأولى التي يسرت له الغناء. اختار المغامرة بارتياد آفاق جديدة مع ملحنين ينتمون إلى مدارس واتجاهات مختلفة، فبدأ مع الملحن النوبي الكبير احمد منيب والى جواره هاني شنودة وواصل بعد ذلك مع إبراهيم رجب ومحمد الشيخ وعبدالعظيم عويضة.

    في «امبارح كان عمري عشرين»، يواصل منير المغامرة في الطرق نفسها، ولكن عبر اكتشافات جديده لصاحبها ولمستمعيه أيضاً، فلا يمل مثلاً من العودة إلى أداء أغنيات معروفة وأساسية في «ريبرتوار» الغناء المصري. وخلافاً لتجاربه في إعادة أغنيات لشادية ونجاة التي تستند في ألحانها الى السلّم «الخماسي» القريب من بيئته النوبية، يذهب هذه المرة الى المطرب الشعبي المنتمي الى دلتا مصر محمد طه ويغني أغنيته الشهيرة «صياد» التي تبدأ بالموال الشهير «يا ليل يا أبو الغلابة يا ليل». وتبدو هذه الأغنية أحد الحلول المتميزة وغير التقليدية التي يلجأ إليها منير منذ سنوات لسحب صوته من مساحة الأداء التقليدي وبصورة تجعله دائماً صوتاً شاباً لا يمل من الخضوع لاختبارات صعبة لكنها تعطيه هذه الحيوية المفتقدة في أبناء جيله من المطربين، وما يزيد من معنى المغامرة هنا اختياره الجزائري حميد بارودي لتوزيع الأغنية ليذهب بها بعيداً من فضائها الشعبي القديم ويكسب بها أرضاً جديدة.

    يعود منير أيضاً إلى شعر عبدالرحيم منصور والحان هاني شنودة ويغني لهما «حاضر يا زهر» البسيطة في معانيها وجملتها الموسيقية القريبة من القلب.
    وفي السياق نفسه الحافل بشجن منير القديم يمكن أن نستمع إلى أغنيات «صوتك» لعبدالمنعم طه ولحن اشرف سالم و»بننجرح» للشاعر محمود رضوان ولحن نبيل جودة وتوزيع رومان بونكا، وهما اغنيتان اقرب في الطابع الى ماضي منير الغنائي ومعهما أغنية «ايديا في جيوبي»، وهي رباعية شبه مجهولة لصلاح جاهين لحنها وجيه عزيز بمزاج حافل بفهم عميق لمعاني الرباعية الحافلة بالاختزال وروعة لحظات القنص. لكن الأغنية الانقلاب في الالبوم هي «حد عايز قلب فاضي» لبهاء الدين محمد وحسن أبو السعود. ميزة الأغنية تأتي من نبرتها الاعترافية الخالية من آثار الهزيمة وصيغتها اللحنية التي تبدأ بنداء اقرب الى نداءات الباعة الجوالين في حواري مصر لكن بضاعة صاحبها العشق وهو راغب في بيع قلب ولكن بشروط «قلب طيب قلب هادي / قلبه كله حنان وعطف / يخطفك م الحزن خطف». واستكمالاً لمغامراته في الانفتاح على تجارب الموسيقى الجزائرية الجديدة، يغني منير «امبارح كان عمري عشرين» كلمات والحان محبوب باتي وتوزيع بارودي أيضاً.

    وإذا كانت الأغنيات السابقة هي مكاسب عشاق منير في مغامرته الجديدة، فإنها مكاسب لم تكن خالية من الخسارة تماماً فهو في الألبوم نفسه يغني أغنيات يصعب القول إنها تضيف إلى تجربته أي جديد، ومنها أغنية «أمر الهوى» للشاعرة كوثر مصطفى ولحن زياد الطويل وهي اقل كثيراً مما حققاه معاً من نجاحات. فالأغنية كلها إعادة إنتاج لمعاني الحب.
    وفي خانة الأغنيات العادية الخالية من طعم الاكتشاف، نستمع لأغنية «حكايته حكاية» و»ويلي» وهما من ريبرتوار غنائي موجود في مناطق مصر الجنوبية وتحديداً في تراث قبائل الجعافرة القريب الى مزاج منير الغنائي في السنوات الأخيرة وهو المزاج الذي تجلى في أغنيته «عشق البنات». لكنه في «ويلي» التي تُغنىّ في أفراح النوبيين والجعافرة في مصر، قد ينجح في جذب مستمعين جدد، لكنه نجاح موقت لا يقارن بنجاح حققته أغنياته الأولى بفضل ما تحتويه من نبرة صادقة.
    ده كلام واحد اسمه سيد محمود بس الراجل ده من الكلام الجامد اللي بيقوله واضح انه تقيل اوي و انا معاه و مؤيده
    و بحب منير لو هيشخر و ينام في الألبوم برضه هيبقى حاجه عاليه من منير
    محمد فوزي برضه
    mohammed.m.fawzy@gmail.com
    mohammed_m_fawzy_m@hotmail.com
  10. Blogger lobbod posted at 5:17 PM  
    koll elly 3ayez a2oolo en nmonir mesh ay 7ad beyesma3o
    we en elly beyesma3om monir dol dayman beteb2a nas momayaza
    leh?
    3ashan monir bey2ool kalam kebeer we 3ayez dema3' kebeera we bane2adam 3ando E7SAS 3ashan yesma3o
    ya3ny de 7'aseya fe el nas elly betesma3 monir
    we 3ala fekra tool 7ayaty koll ma2abel 7ad beyesma3 monir ba7termo lellaah fe lellaah
    leh?
    3ashan howa talama beyesma3 monir yeb2a lazem tekoon feeh el sefat elly ana oltaha de
    bass lel asaf ya kabtin yally me3alla2 3ala shereet monir a7eb a2ollak en enta fatsha kebeera geddan
    3aref ya3ny eah fatsha?
    fatsha ya3ny ay kalam
    ya3ny enta men el a7'er matesta7e22esh tekoon men sammee3et monir
    3aref leh?
    3ashan enta mafhemtesh shereeto
    tayeb 3aref ma3na enn enta mafhemtesh shereeto da eah?
    enn enta el sefat elly oltaha de mesh mawgooda feek
    fa law sama7t mat3alla2sh fashalak fe ennak tefham el shereet da we tesma3o we te7ebbo 3ala shama3et MESH KOLL MARRA YA MONIR
    3ala fekra ana bakteb el kalam da we ana fe3lan ma3'looooool geddan
    we dammy fayer
    we law sama7t enta ba2a e3mel ay 7aga 3al net 3'er ennak tegeeb fe seeret monir
    we sorry law kont daye2tak be kalamy bass 3'asb 3anny enta estafazetny
    we a7eb a2ool fe el a7'er enno
    kefaya we kefaya somma kefaya taree2et monir fe el 3'na de te3'ny 3an ay kalemat we ay al7an we ay 7aga tanya
    bass begad ya ret matez3alsh mnenny enny olt kalam gamed fe 7a22ak bass ana olt keda 3ashan terga3 le sawabak we tesma3 el shereet da tany we yaret terodd kaman 3ala kalamy da men 3'er kebr
    we ana mota2akked law enta fe3lan sammee3 le monir hatesma3 el shereet tany we hat7ebbo amma ba2a law ma7abetsh el shereet fa ama hattar asefan enny ma2rash el comment beta3ak
    3aref leh?
    3ashan hab2a sa3etha kerehtak geddan
  11. Blogger S H E B A K posted at 2:26 PM  
    أعتذر عن التأخير فى الرد لكن هتلاقوه فى البوست اللى فوق
  12. Blogger lobbod posted at 6:21 PM  
    tayeb we howa da yenfa3???!!
  13. Blogger lobbod posted at 6:31 PM  
    a7eb arod 3ala el ostaz elly bey2ool en o3'neyat meen ya7'od alby el malyan we yeddeeny alby el fady de shabah o3'neyat 7ad 3ayez alb fady..........
    elly bet2oolo da SEFR kebeer ya3ne big ZERO .
    mafeesh ay no3 men anwa3 el shabah fe el o3'neyeteen
    da wala 7atta fe el retm ya ragel
    enta 3aref ba2a ???
    mayenfa3sh keda , ento betnazzelo men 2eemet monr geddan
    we el zaher keda enno zaman kan a7san lamma kont betla2y mesh ay 7ad beyesma3 monir bass delwa2ty ba2a koll men habb we dab beyesma3 monir.
    de 7aga el 7aga el tanya ba2a
    de be7'osoos el captin emad bass abl mabda2 kalamy 3ayez a2ollo EZAYYAK YA KAPTIN???? hehehehheee.
    el mohem
    ba2 ya ragel mesh maksoof lamma te2ool enn o3'neyet lamma el naseem de heya 3alama men 3alamat mo7amed moneer
    ok
    a7eb a2ollak ba2a enn o3'neyet lamma el naseem de ba3eeda koll el bo3d 3an mo7ammed monir
    aywa matet7'adesh keda
    monir lamma kan bey3'anny le 7abebto kan bey2ollaha ( ya na7'la bekreyya 3alya ) we makansh bey2ollaha lamma el naseem bey3addy ben sha3rek 7abebty basma3o bey2ool ahat
    we da mesh ma3naa enny ba2ool en lamma el naseem de o3'neya we7sha
    bel 3aks
    lamma el naseem o3'neya gameela geddan bass momken tetka3bel fe m7ammad fo2ad aw 3amr diab aw...aw...
    ya ret ya ostazy tekoon fehemt asdy
    salam
    LoBBoD
  14. Blogger S H E B A K posted at 1:52 AM  
    انا مش فاهم حضرتك بترد هنا ليه مع انى رديت عليك بمنتهى الوضوح فى البوست الجديد
    لو انت بلوجر جديد استعمل الينك ده
    http://shebak.blogspot.com/
  15. Anonymous زياد الطويل posted at 11:56 PM  
    http://www.express0555.com/news/arabic/details.asp?article_id=76099&news_type=ArEtertainment
    مع كل الاحترام لجميع الأرأ.....
  16. Anonymous Anonymous posted at 3:42 AM  
    السلام عليكم بعد التحيه لكل الاخوة والاخوات
    منير هو صوت مصر وانا لا اظن انه بعد كل المشوار ده يعمل عمل ما يرضيش الناس لان لو العمل مش كويس ماكنش نزله اصلا وده منير الى نعرفه .انا باسمع منير من اول ما بدا يغنى وهو مش زى اى مغنى تسمعه وتفهمه من اول مره،لا دا انت لازم تسمعه اكثر من مره ومش كده وبس دا انت لازم تكون بتفهم معانى الكلمات وتعيش فى خيالها هو دا منير والى عايز يعرف معنى الشريط داايه يسمع مشوار منير من اول ما ابتدا يغنى
    علشان يقدر يفهم
  17. Anonymous Anonymous posted at 2:55 AM  
    سلامى كل الموجودين اولا
    انا مش هاتكلم كتير بعد كلامكم
    بس هما سؤالين بس ومحتاج الرد
    هل من الممكن ان منير يضحى بمشوار الربع قرن بسهولة كدة
    هل من الممكن ان منير يغنى لفئة واحدة بس من الجماهير
    الى عايز اقولوا ان احنا بنتكلم كدة عن منير بمنطلق العتاب وبس
    لو كل واحد حطة نفسة مكان منير هايعرف ان منير لحد الان افضل مطرب على مستوى جيلة كلة برغم كل الى بقدمة
    انتوا لاو فعلا عايزين تعرفوا منير هاتوا اى البوم لمطرب كبير زى عمرودياب وهاتوا اخر البوم لمنير زى امبارح كان عمرى عشرين مثلا وقارنوا مابين الاتنين من حيث الكلمات والالحان والتوزيع
    وانت هاتعرفوا ان منير لسة منير الى بنحبة والى عودنا دايما على الامل والتجدد والتفائل
    سلااااااااااااااااام
  18. Anonymous Anonymous posted at 2:11 PM  
    ان شايف ان فى بهايم مش بتفهم حاجه زى حضراتكم لا عارفين منير ايه ولا فاهمين هو بيغنى ايه يا خساره
  19. Anonymous Anonymous posted at 1:06 AM  
    الاخبار|اخبار مصر|اخبار الرياضة|اخبار الحوادث|اخبار الاهلى|اخبار الزمالك|الاهلى|الزمالك|الرياضة المصرية|يلا كورة|صحف مصرية|الصحف المصرية|المصرى اليوم|اليوم السابع|يوتيوب
    الاخبار|اخبار مصر|اخبار الرياضة|اخبار الحوادث|اخبار الاهلى|اخبار الزمالك|الاهلى|الزمالك|الرياضة المصرية|يلا كورة|صحف مصرية|الصحف المصرية|المصرى اليوم|اليوم السابع|يوتيوب

Post a Comment

« Home