Tuesday, March 04, 2008

حدش شاف اسامة بن لادن يا جدعان ؟


فى فيلمة التسجيلى الاول Super Size Me يقرر Morgan Spurlock انه هياكل لمدة شهر كامل الثلاث وجبات كاملة من ماكدونالدز ... فى البداية انا شخصيا كمشاهد اعتبرت ده نوع محاولة استفزاز مشاعر شخص أكيل مثلى و ان انا ممكن بمنتهى البساطة اعمل فيلم شبهه لو اتوفرتلى وجبات ماكدونلدز زى اخينا ده ... فين الفيلم فى الموضوع اصلا!! ... لكن الفيلم فعلا يشد ... لان الاخ ده بيحكى ايه اللى بيحصله صحيا طوال الشهر ده و الاضرار اللى تعرضلها قرب نهاية المدة و ده بشكل تسجيلى ... بيروح لدكاترة فعلا بيقيسوا حالته الصحية قبل و اثناء و بعد الشهر ده ... العجيب ان شخص ممتاز صحيا يتحول بعد شهر واحد ماكدونالدز لشخص يقرب على الموت تقريبا ... الفيلم ده اخد جوايز كتيرة ابرزها جائزه احسن مخرج فيلم وثائقى عام 2004 من مهرجان ساندانس

أما فى فيلمة الجديد ?Where in the World Is Osama Bin Laden قرر استاذ مورجان انه مش واثق فى المارينز الامريكانى و اقمار التجسس و كل الكلام الفاضى ده و انه هيروح بنفسة يلف الشرق الاوسط يدور على اسامه بن لادن ... على اساس ان اللى يسأل ميتهش و دى طبعا طريقة بوش معملهاش عشان هو بيتكسف يسال و كدة ...المهم انه فى بداية الفيلم بيقولك ان مراتة حامل و هيكون اب قريب (عقبال عندكم) و ده مخليه يفكر فى توفير السلام و الامان على الكوكب اللى هيستقبل المحروس و بالتالى البحث عن اكتر شخص مطلوب بتهمة الارهاب فى التاريخ ... طبعا البقين دول كلام فاضى ...

الفيلم عرض ايضا فى نفس المهرجان السنة دى ... و بيقول بعض النقاد عنة ان فيلم دمه خفيف بالرغم من انه مجاوبش على السؤ ال اللى بيطرحة ... بينما نقاد تانين شايفين ان الفيلم عبارة عن كوميديا بهتانة و تكلفة مبالغ فيه و لعب على تيمة شغالة كويس اليومين دول و هى الشرق الاوسط

أنا عن نفسى مستنى اشوفة على سبيل الفضول و معجب بالبوستر اللى بيقلد Indiana Jones اللى بالمناسبة هينزل منه جزء جديد السنه دى ... العب يا هاريسون و وريهم :)


Labels:

Posted by S H E B A K at 12:01 PM



3 Comments

  1. Blogger زمان الوصل posted at 9:30 PM  
    غريبه أوى موضوع فيلم "ماكدونالدز" ده
    و الشركه لم تعترض !!

    متهيّألى أى إنسان ياكل أى وجبه مهما كانت صحيّه و مغذيّه لهذه المدّه لازم يتلخبط صحيّا ..
  2. Anonymous أحمد posted at 8:06 AM  
    مورجان هيخلف ؟ كويس و الله ..يعني الراجل لسه زي الفل و مراته كانت بتتبلى عليه و على ماكدونالدز : )

    الفيلم ده بيجي كتير في الشو تايم و ما أخبيش عليك بيعمل معايا رد فعل عكسي و كل ما أشوفه أطلب ماك :)

    منتظر برضه الفيلم الجديد بس مش متوقع شئ عبقري ..هو راجل لذيذ و ماشي على خطى مايكل مور بس بمضمون أضعف و خفة دم أقل .
  3. Anonymous egypt-panorama.com posted at 7:54 PM  
    منتديات بانوراما مصر منتدى مصرى للحوار والنقاش و يهتم ,أخبار مصر ,أخبار منوعة أخبار التعليم ونتائج الامتحانات اخبار الفن والفنانين الرياضة المصرية أفلام الموسم الرشاقة والتخسيس الموضة والمكياج والازياء كلمات الاغانى برامج مجانية تحسين نتائج البحث وعيرهم الكثير من المنتديات الفرعية .

Post a Comment

« Home