Les Triplettes de Belleville
دائما اجمل قصص الاطفال بتكون فرنساوى ... اتصفح كتاب اطفال فرنساوى و انت تحس انه مختلف عن اى كتاب اطفال تانى
الفرنسيين مميزين جدا فى رسومات الاطفال و التفاصيل و الالوان و الى جانب ده هما عفاريت افكار عيالى و خيال بسيط لحد العبقرية ..
بحس انك لو سبت طفل يقرا كتب اطفال فرنساوى بس هيطلع يا عبقرى يا مجنون من كم الافكار المطرقعة فى الكتب دى ...عندهم فن الحكى عالى جدا
Les Triplettes De Belleville فيلم كارتون فرنساوى انتاج 2003 اترشح لجائزتين اوسكار
الفيلم انا بعتبرة من اجمل افلام الكارتون اللى شوفتها فى حياتى ...
الكادر الواحد من الفيلم ممكن تثبتة و تقعد تتفرج على كم التفاصيل الانهائى و دى من الحاجات برضة اللى تميز الكارتون الفرنسى و اعتقد انهم كلهم يتبعوا مدرسة ايرجية رسام الكوميكس البلجيكى صاحب كوميكس تان تان الشهيرة
الالوان كمان عجيبة جدا .. اختيار الوان مناسبة جدا للمود اللى عايزين يوصلوه
و طبعا رسم الشخصيات سواء كتصميم و رسم او رسمهم فى الدراما .. كل شخصية عاملة ازاى و ايه لزماتها او إعقاتها مثلا
المزيكا كمان حلوة جدا و قائمة على الـ percussion او الايقاعات خاصة التى تعزف بالاشياء (تلاجة .. عجلة .. جرنال ... مكنسة كهربائية) :)
المهم .. انا استمتعت فعلا و ده اللى خلانى اكتب عنة حتى لو مقلتش كلام يتعدى الاعجاب الطفولى بالفيلم ..
لكن دى مجرد حجة بس عشان اقدملكم الاجزاء دى منه...
و بالمناسبة طبعا مش عايز انسى اشكر فريق عمل كارتون (سوبر هنيدى ) على المجهود الجبار اللى اتعمل فى رسم ال17 كادر بتوع كل حلقة
Labels: انيميشن
Posted by S H E B A K at 12:39 PM
15 comments
